АТГ-аас УИХ-ын гишүүн асан Н.Батбаяр, Б.Гарамгайбаатар нарыг баривчилж, Шүүхийн шийдвэр гүйцэтгэлийн ерөнхий газрын харьяа цагдан хорих 461-р ангид саатуулаад буй. Тэдэнтэй уулзахаар АН-ын төлөөлөл хорих анги руу явсан гэдгийг Ерөнхий нарийн бичгийн дарга О.Магнай хэллээ.
Энэ баривчилгааны талаар нийслэлийн АН-ын дарга Э.Бат-Үүл “Сонсоход чихэндээ итгэмээргүй юм. Манай хоёр хүн ч, өмгөөлөгчид ч хууль ёсыг нэхэж байгаа. Шалгаж болно. Хуулийн дагуу шалга. Хуулийг дандаа улаан цайм зөрчиж байна. Хүний ёсноос хэтрүүлсэн байдалтай байна. 37 оны хэлмэгдүүлэлтийн үед Амар Ерөнхий сайдыг Монгол Улсын тусгаар тогтнолоо тэмдэглэдэг баярын өдөр цаазалсан байдаг. Цагаан сарын өмнө барьж хорьж байгаа нь ийм зүйл сэргэж байна уу гэж бодмоор. Ингэж сэтгэл санааны дарамтад оруулж байна. Цагаан сарын өмнө барьж хорино гэдэг чинь дарамт байхгүй юу” хэмээн байр сууриа илэрхийллээ.
Н.Батбаяр, Б.Гарамгайбаатар нарыг үргэлжлүүлэн хорих эсвэл батлан даалтад гаргах эсэхийг шүүх маргааш шийднэ.
В.Бат