Үерийн гамшгийн улмаас орон гэргүй болсон ОХУ-ын Эрхүү мужийн оршин суугчдад төрөл бүрийн тусламжийг бусад орон нутгаас төдийгүй Монгол улсаас ч илгээсээр байгаа юм. 

Харин ийнхүү хохирогчдод зориулсан тусламжийн барааг дундаас нь завшин, дамлан зарж байгаа талаар Эрхүү мужийн иргэд гомдол гаргажээ. 

Үүний хариуд Эрхүү мужийн захирагч Сергей Левченко асуудалд хатуу хяналт тавина гэж амласан байна. 

“Хүмүүнлэгийн тусламжийг тараах явцыг цагдаагийнхнаар хянуулна. Зүй бусаар ашиглаж буй үйлдлийг таслан зогсооно” хэмээн Сергей Левченко Инстаграм хуудсандаа бичсний дээр хүмүүнлэгийн тусламжийн тээвэрлэлтээс орон нутагт хүргэн хүлээлгэж өгөх хүртэл бүхий л шатанд хяналт шалгалт тавина гэж амласан байна. 

Эргэн сануулахад, Эрхүү мужид ширүүн борооны улмаас голын усны түвшин нэмэгдэж, үер буусны улмаас 98 суурин газар , нийтдээ 10 мянга гаруй байшин усанд автан, 21 хүн амиа алдаж, 340 хүн гэмтэж бэртсэн юм. 

Одоо Эрхүү мужийн хэд хэдэн хотод сайн дурынхан хүмүүнлэгийн тусламж цуглуулах, хүргэх ажлыг зохион байгуулж байгаа бөгөөд 70 тонн хүнсний бүтээгдэхүүн, 55 мянган ундны ус, 20 тонн хувцас, гутал хохирогчдод олгожээ. 

В.Путин Эрхүү хотын үертэй тэмцэхэд арми дайчлахыг үүрэг болгожээ 

Г.Бямбасүрэн