Шинэ төрлийн титэм вирусийн халдварын тархалт хурдацтай нэмэгдэж, Европ дахь өвчний голомт болсон Итали улсад БНХАУ, Куб, ОХУ тусламжийн гараа сунгаж байгаа юм. 

ОХУ-ын Ерөнхийлөгч Владимир Путин Италийн Ерөнхий сайдтай утсаар ярилцах үеэрээ ОХУ туслахад бэлэн байгаагаа илэрхийлж, улмаар гуравдугаар сарын 23-нд  Оросын тусламжийн есөн онгоц Италид газардаж, 100 орчим цэргийн эмч, вирус судлаач, эмч нарын найман отрядыг хүргэсэн.

Мөн гуравдугаар сарын 24-ний мягмар гаригт Ромын ойролцоох Пратика-ди-Маре агаарын баазад Оросын 14 дэх онгоц газардсан талаар бид мэдээлж байлаа. 

Тусламж үүгээр зогссонгүй, гуравдугаар сарын 24-нд Москвагийн "Чкаловский" нисэх буудлаас Италийн агаарын цэргийн бааз руу титэм вирустэй тэмцэхэд зориулсан тусгай тоног төхөөрөмж, хэрэгсэл хүргэх 15 дахь Ил-76 онгоц хөөрчээ. 

ОХУ-ын Батлан хамгаалах яамны мэдээлснээр, Оросын цэргийн мэргэжилтнүүд нэн тэргүүнд Бергамо хотод ажиллах юм байна. 

Энд дуулгахад, Италид одоогийн байдлаар 69 мянган хүн халдвар авснаас 6820 хүн амиа алджээ. 

COVID-19: ОХУ-ын тусламжийн 14 дэх онгоц Италид газардлаа

Г.Бямбасүрэн