Оросын Ерөнхийлөгч Владимир Путин Францын Ерөнхийлөгч Эммануэль Макронтой есдүгээр сарын 14-ний өдөр утсаар ярих үеэрээ Оросын сөрөг хүчний улс төрч Алексей Навальный хордсонтой холбоотой сэдвийг хөнджээ. Энэ талаар Францын Le Monde сонин өөрийн эх сурвалжаас авсан мэдээлэлтэйгээр дамжуулсан байна.
Эх сурвалжийн мэдээлснээр, Владимир Путин Оросын сөрөг хүчний улс төрч Навальныйг ярихдаа басамжлангуй өнгөөр ярьсны дээр өмнө нь янз бүрийн өвчин зохиож ярьж байсны дээр парламентын зарим гишүүд, албан тушаалтнуудыг сүрдүүлэхийн тулд Авлигатай тэмцэх санг ашиглаж, хууль бус үйлдэл хийдэг интернетийн ердийн нэг чалчигч хэмээн ярьсан гэнэ.
Түүнчлэн Навальный хордсон хэрэг дээр өөр хувилбаруудыг ч авч үзэх ёстой гэж Путин өгүүлжээ. Тухайлбал, "Новичок" хордуулагч бодис гарган авсан эрдэмтэн Латвид амьдардаг тул энэ хэрэг Латвитай холбоотой байж магадгүй гэнэ. Түүнчлэн Навальный өөрөө ч хор уусан байхыг үгүйсгэхгүй гэж Путин өгүүлсэн байна.
Харин Макрон энэ хоёр хувилбарыг тэр дор нь үгүйсгэн, Францын мэргэжилтнүүд Навальныйн биеэс "Новичок" төрлийн хордуулагч бодисын ул мөр олсон гэдгийг Путинд дуулгажээ. Түүнчлэн, хувийн байгууллага "Новичок"-ийг ашиглах боломжгүй тул Оросын албан ёсны тайлбар хэрэгтэйг ч онцолжээ.
Эргэн сануулахад, Оросын сөрөг хүчний төлөөлөгч Навальный өнгөрсөн сард бие нь муудаж, улмаар Герман хотноо эмчлүүлж байгаа юм. Тэрбээр удаан хугацаанд комд байсны эцэст сэргэсэн бөгөөд түүнийг "Новичок" бүлгийн хороор хордуулсан, үүнд Оросын эрх баригчид буруутай гэж барууны орнууд үзэж байгаа. Харин ОХУ-ын эрх баригчид үүнийг удаа дараа няцаасаар байгаа юм.
Навальныйг хордуулсан гэж Герман үзсэн "Новичок" гэж юу вэ?