Коронавирусийн гарал үүслийг судлахаар Дэлхийн эрүүл мэндийн байгууллагын шинжээчдийн баг Хятадын Ухань хотод ажиллахаар болсон ч Хятадын эрх баригчид нэвтрэх зөвшөөрөл өнөө хэр нь өгөөгүй байгаа талаар ДЭМБ-ын тэргүүн мэдэгдсэнийг өмнө нь бид мэдээлсэн. 

ДЭМБ: Шинжээчдэд Хятад руу нэвтрэх зөвшөөрөл өгөөгүй

ДЭМБ-ын тэргүүний энэхүү мэдэгдэлд БНХАУ-ын Гадаад хэргийн яам хариу өгсөн байна. Тодруулбал, БНХАУ-ын ГХЯ-ны албан ёсны төлөөлөгч Хуа Чуньин хариу тайлбар өгөхдөө ДЭМБ-ын олон улсын шинжээчдийн баг ирэх огноо болон Хятадад ажиллах нарийн төлөвлөгөөг хэлэлцэж байгаа, энэ нь ердөө виз бүрдүүлэлтийн асуудал төдий биш хэмээн онцолжээ.

"Надад байгаа мэдээллээр, талууд шинжээчид ирэх өдөр болон хөтөлбөрийг тодорхой болгохын тулд өнөө хэр нь нягт харилцаатай байгаа. Талууд эдгээр асуудлуудыг аль болох хурдан шийднэ гэж бид найдаж байна. Энэ бол зөвхөн виз бүрдүүлэлтийн асуудал биш, талууд олон улсын шинжээчдийн багийн ирэх хугацаа, ажлын төлөвлөгөөг хэлэлцэж байгаа" хэмээн Хуа Чуньин мэдэгджээ.

Түүнчлэн, ДЭМБ-ын тэргүүний байр суурь, түүний санаа зовниж байгааг бүрэн ойлгож байгаа ч шинжээчид амжилттай ажиллахын тулд ажлын нарийвчилсан төлөвлөгөөг хэлэлцэх шаардлагатай хэмээн нэмж өгүүлсэн байна.

Вирусийн үүслийг судлах шинжээчид Уханьд очихоо олон сар хүлээж байна

Шинэ төрлийн коронавирусийн үүслийг судлах олон улсын багт Япон, Катар, АНУ, Герман, Вьетнам, Австрали, Нидерланд, Их Британи, Дани, ОХУ-ын шинжээчид багтаж байгаа юм.  

ДЭМБ коронавирусийн үүслийг , вирус амьтнаас хүнд чухамхүү хэрхэн халдсаныг тогтоохын тулд вирусийн дээжүүд авахуулахаар 10 мэргэжилтнээс бүрдсэн шинжээчийн багаа БНХАУ илгээх гэж олон сар хүлээж байгаа. Ингээд эцэст нь 12 дугаар сард ДЭМБ мэдэгдэл хийхдээ 2021 оны нэгдүгээр сард шинжээчдийн ажил эхэлнэ хэмээж байв.

Мягмар гарагт энэ багийн хоёр гишүүн Хятадыг зорьсон ч визний асуудлын улмаас нэг нь буцаж, нөгөө нь гуравдагч оронд хүлээж байгаа гэнэ. 

Вирус хаанаас үүсэв? 

Covid-19 анх 2019 оны сүүлээр Хятадын Ухань хотноо илэрсэн юм. Анхандаа энэ вирус Хятадад ихээхэн алдартай зоогт тооцогддог хуягт гүрвэлийн мах зарж байсан захаас үүсэлтэй гэж үзэж байв. Хуягт гүрвэлийг Хятадын ардын эмчилгээнд ч мөн хэрэглэдэг аж. 

Чухамхүү Уханийн энэ захаас вирус мутацид орж, амьтнаас хүнд халдсан гэсэн хувилбар анхнаасаа л яригдаж байлаа. Гэхдээ вирусийн үүслийн талаарх ширүүхэн маргаан шинжлэх ухааны хүрээлэлд өнөө хэр өрнөж байгаа юм. Зарим мэргэжилтнүүд вирус Уханийн зах дээр үүсээгүй, энэ зах вирус дэгдэхэд таатай орчин болсон төдий гэж үздэг.

Түүнчлэн, хүнд халдварлах чадвартай коронавирусүүд олон арван жилийн туршид сарьсан багваахайнуудаас илэрч байсан гэх хувилбар ч байдаг. Гэхдээ вирус хүнд халдварлахын тулд завсрын тээгч шаардлагатай байсан бөгөөд чухам ямар амьтан тээгч байсан талаар одоо хэр тодорхойгүй байгаа юм. 

Энэ зуур Хятад вирусийн үүслийн талаарх ерөнхий төсөөллийг өөрчлөхийг оролдож, өндөр албан тушаалтнууд нь хэд хэдэн бүсэд өвчин зэрэг дэгдсэн гэх судалгаануудыг ихээхэн иш татах болсон байна.

Г.Бямбасүрэн