Нэгдүгээр сарын 23-ны өдөр Оросын 110 гаруй хотод сөрөг хүчний улс төрч Алексей Навальныйг суллахыг шаардсан жагсаал болсон нь тус улсын шинэ үеийн түүхэн дэх хамгийн өргөнх цар хүрээтэй жагсаал болсон талаар бид өмнө нь мэдээлж байлаа. 

ТОЙМ: Цойгийн дуун дор нэгдсэн нь буюу юу болоод өнгөрөв өө

Энэ үеэр олон хүн баривчлагдсан ч Навальныйн штабынхан долоо хоногийн дараа дахин жагсаал зохион байгуулна гэж мэдэгдэж байлаа. Тиймдээ ч Оросын эрх баригчид амралтын өдөр олныг хамарсан цуглаан гарахаас сэрэмжилж, метроны буудал хаах зэргээр олон хязгаарлалт тавьсан байна. Гэсэн ч нэгдүгээр сарын 31-ний ням гарагт эсэргүүцлийн давалгаа дахин гарчээ.

Нэгдүгээр сарын 31-ний өдөр Мосва хотод ихээхэн хязгаарлалтууд тавьсан байна. Улаан талбай, музейн цогцолборыг бүхэлд нь хааж, газар доогуурх тээврийн хөдөлгөөний чиглэлүүдийг өөрчлөн, нийслэлийн төвд байх метроны долоон өртөөг хааж, явган зорчигчдын хөдөлгөөнийг хязгаарлажээ. Түүнчлэн энэ өдөр хотын төвд байрлах кафе, зоогийн газар, бааруудын үйл ажиллагааг хязгаарласан байна. Мөн хотын зарим дүүргүүдэд согтууруулах ундаа болон шилэн савлагаатай ундаа зарахыг хязгаарлажээ. 

Ням гарагт хязгаарлалтууд Оросын бусад хотуудад ч үйлчилсэн байна. Мөн цагдаагийн хамгаалалт ихээр гарсан бөгөөд хотын төвүүдэд цагдаагийнхны тоо нэмэгдэж, цагдаа нар хоорондоо 2-3 метрийн зайтай зогсоцгоож байсан талаар news.ru мэдээлжээ. 

Москва хотод болсон жагсаалд хичнээн хүн оролцсон талаарх бодитой тоо гараагүй байна. Харин Дотоод хэргийн яам "2000 гаруй хүн оролцсон" гэж мэдээлжээ. Хэвлэлүүдийн мэдээлснээр, жагсаалын үеэр эсэргүүцэгчдийг дэмжиж буйгаа илэрхийлэн дуут дохио өгсөн жолооч нарын бичиг баримтыг цагдаагийнхан шалгаж байсан гэнэ. 

Оросын эрх баригчид энэхүү эсэргүүцлийн ажиллагааг "хууль бус" хэмээн нэрлэж байгаа тул цагдаагийнхан жагсагчдыг тараахын тулд хүч хэрэглэсэн гэж news.ru мэдээлжээ. Эх сурвалжийн мэдээлснээр жагсагчдыг цагдаагийнхан бороохойгоор цохиж, нулимс асгаруулагч, цахилгаан бороохой ашигласан бөгөөд энэ үеэр гэмтэл авсан хүн ч гарсан гэнэ. 

Москвагийн цагаар ням гарагийн 16.00 цагийн байдлаар Орос даяар болсон эсэргүүцлийн арга хэмжээн дээрээс 2119 хүн баривчлагдсанаас 469 нь Москвад, 211 нь Санкт-Петербург, 194 нь Красноярск, 120 нь Владивосток, 103 нь Новосибирск хотод баривчлагдсан гэж "ОВД-Инфо" мэдээлжээ. Баривчлагдсан хүмүүсийн дунд Навальныйн эхнэр Юлия Навальная байсан гэж ВВС дамжуулсан байна. Өмнө нь болсон жагсаалын үеэр тэрбээр мөн саатуулагдаж байв. 

РБК агентлагийн мэдээлснээр, Москва хотноо эсэргүүцэгчид Алексей Навальный саатуулагдаж буй урьдчилан хорих төв рүү хүрсэн байна. Цагдаагийнхан тэднийг энэ төв рүү ойртуулахгүйн тулд гудамжийг хаан, хамгаалалтад зогсчээ. Хүмүүс "Эрх чөлөө" хэмээн хашгиралдаж байсан бол замын эсрэг талын байранд Виктор Цойгийн "Өөрчлөлт" дуу эгшиглэж байсан гэж ВВС агентлаг дамжуулжээ. 

Оросын хотуудад өрнөсөн жагсаалын үеэр баривчлагдсан хүмүүсийн тоо шинэ үеийн түүхэн дэх дээд амжилт тогтоосон гэж хэвлэлүүд мэдээлсэн байна. "ОВД-Инфо" -иийн мэдээлснээр Москвагийн цагаар 23:45 цагийн байдлаар Оросын 85 хотод нийтдээ 5135 хүн баривчлагдсанаас 1653 нь Москвад, 1159 Петербург хотод баривчлагджээ.

Путины ордон худал болж таарав уу? 

Олон сая хүн үзсэн, "Путины ордон"-ы тухай кино гарснаас хойш Оросын төдийгүй олон улсын хэвлэлүүдээр энэ сэдэв анхаарал татсан мэдээлэл болсон хэвээр байлаа. Харин өнгөрсөн амралтын өдрүүдэд Оросын хэвлэлүүдээр Навальныйн киноны мөрөөр хийсэн сурвалжлага мэдээллүүд цуварч эхлэв. 

Өнгөрсөн баасан гарагт, Кремльд ойрхон гэгддэг Mash телеграм суваг Геленжикт байх "Путины ордон"-ы дотор талыг харуулсан дүрс бичлэг нийтэлсэн юм. Дүрс бичлэгийг ЭНД даран үзэх боломжтой.Таван минутын хугацаатай энэ дүрс бичлэг дээр Геленжикт байх барилга үнэндээ тансаг ордон болох хараахан болоогүй, барилгачид дотоод заслыг дөнгөж эхэлж байгаа нь харагдана. 

"Энд том бетонууд л байна. Ер нь бол барилгын ажил зогссон байдалтай. Товчоор бол найзуудынхаа өмнө гайхуулаад байх юм алга. Урам хугарчихлаа" хэмээн Mash сувгийн ерөнхий редактор Максим Иксанов ярьжээ. 

Навальныйн кинон дээр гарч байсан "усан тамхины өрөө"-нд барилгачид амьдардаг аж. Мөн усан сан ч бэлэн болоогүй, "усан дискотек" гэж нэрлэж байсан газар нь усан оргилууртай төстэй газар байна хэмээн Mash мэдээлсэн юм.

Энэ мэдээллийн дараахан Оросын олигарх Аркадий Ротенберг Геленжик дахь энэхүү объектын эзэн гэдгээ зарласан юм. Тэрбээр энэ объектыг зочид буудлын зориулалтаар барьж байгаа хэмээн мэдэгдсэн байна.

"Идокопас дахь цогцолбор нь миний барьж буй цорын ганц зочид буудлын объект биш. Хөл хорионы үеэр дотоод аяллын эрэлт их байгаа, нөгөө талаас жуулчдыг байрлуулах сууц хангалтгүй байгаа нь харагдлаа. Бизнесийн энэ чиглэлд хөрөнгө оруулсан хэвээр байна" хэмээн Ротенберг мэдэгджээ.

Түүний өгүүлснээр энэ дээд зэрэглэлийн зочид буудлын тохижилтын ажлыг "тун чамай, чанартай, мэргэжлийн түвшинд" хийх тул хоёр жилийн дараа барилгын ажил дуусна гэж төлөвлөж байгаа тухайгаа Znak.com-д ярьжээ. Гэхдээ энэ объектын өртгийн талаар болон зочид буудал барихад хичнээн хэмжээний хөрөнгө зарцуулсан талаарх сэтгүүлчийн асуултад хариулаагүй байна. Түүнчлэн, дөнгөж баригдаж буй энгийн нэг зочид буудал нислэггүй бүсэд байгаагийн учрыг ч дэлгээгүй аж. 

Аркадий Ротенберг нь ОХУ-ын Ерөнхийлөгч Владимир Путиний дотны нөхдийн нэг гэнэ.

Эргэн сануулахад, нэгдүгээр сарын 19-нд Навальныйн Авлигатай тэмцэх сан "Путинд зориулсан ордон буюу асар том авлигын түүх" нэртэй киног Юүтүб сувагтаа байршуулсан юм. Хоёрхон өдрийн дотор 50 сая хандалт авч байсан энэ бичлэгийг ням гарагийн байдлаар нийт 100 сая гаруй удаа үзжээ. Эрэн сурвалжлах нэвтрүүлэг нь Геленжикийн ойролцоох "Путиний ордон"-ы тухай бөгөөд энэ ордон нь Монакогийн вант улсын дайны 39 нутаг дэвсгэртэй тэнцэх гэнэ. Путиний энэхүү ордныг барихын тулд 100 тэрбум рубль буюу монгол мөнгөөр 3.5 их наяд төгрөг зарцуулсан бөгөөд санхүүжилтийг төрийн корпорациуд хийсэн гэж нэвтрүүлэгт өгүүлсэн байна. Эрэн сурвалжлах нэвтрүүлэгт "Роснефть", "Транснефть" зэрэг төрийн компаниуд барилгын ажилд зориулан мөнгө шилжүүлдэг авлигын схемийг харуулжээ. Путин улсын корпорациудын өнөөгийн тэргүүнүүдтэй нөхөрлөдөг нь энэхүү авилгын системийг үүсгэсэн гэж Авлигатай тэмцэх сан баталж байгаа аж. Путины ордонд боомт, хувийн хамгаалалт, сүм, хяналт шалгалтын хэсэг, нислэггүй бүс, тэр бүү хэл хилийн боомт хүртэл байдаг, цогцолборын бүрэлдэхүүнд газар доорх хоккейн талбай, цэцэрлэгт хүрээлэн, наран шарлагын газар болон газар доорх дарсны өрөө рүү хүргэдэг хонгил, театр, казино, саун, усанд сэлэх хэсэг, усны дискотек, төрөл бүрийн цех байдаг хэмээн нэвтрүүлэгт өгүүлдэг. 

Г.Бямбасүрэн