ОХУ-ын Ерөнхийлөгч Владимир Путин АНУ-ын Ерөнхийлөгч Жо Байдентай хоёр талын харилцаа, стратегийн тогтвортой байдал, бүс нутгийн сөргөлдөөн болон хүн төрөлхтний өмнө өнөөдөр тулгарч буй асуудлууд, тэр дундаа коронавирусийн цар тахлын талаар ярилцах хүсэлтэй байгаагаа гуравдугаар сарын 18-ны өдөр "Россия 24" телевизийн эфирээр мэдэгджээ.
"Бидэнд ярилцах, санал солилцох зүйлс бий. Гэхдээ шууд, шударга яриа, шууд эфирээр ярилцвал шүү дээ" хэмээн Путин мэдэгджээ.
Оросын Гадаад хэргийн яамны албан ёсны төлөөлөгч Мария Захаровагийн мэдээлснээр, Путиний даалгавраар Вашингтонтой ярих бэлтгэл ажлыг хэдийнэ эхлүүлсэн бөгөөд Оросын Ерөнхийлөгч гуравдугаар сарын 19-ний баасан гарагт эсвэл гуравдугаар сарын 22-ны өдөр утсаар ярилцах хүсэлтэй байгаа гэнэ.
Харин Байден Путинтэй ойрын үед ярихад бэлэн байгаа эсэхийг хэлэх боломжгүй гэж Цагаан ордны хэвлэлийн нарийн бичгийн дарга Жен Псаки гуравдугаар сарын 18-ны өдөр хийсэн хэвлэлийн хурал дээр мэдэгдсэн байна.
"Утсаар хэлэлцээ хийх талаар та бүхэнд дамжуулах мэдээлэл надад алга. Ерөнхийлөгч маргааш Жоржияд очно, их завгүй байна" хэмээн Жен Псаки мэдэгджээ.
Энд дуулгахад, Байден АВС телевизэд өгсөн ярилцлагынхаа үеэр Путинийг "алуурчин" гэсэн нь ихээхэн шуугиан тарьсан юм. Энэ талаар Путинээс ямар байр суурьтай байгаа талаар асуухад тэрбээр дараах хариултыг өгчээ.
"Би юу гэж хариулах вэ дээ?! Эрүүл байгаарай гэж л хэлэх байсан. Би түүнд эрүүл энхийг хүсч байна"
Түүнчлэн Путин "индиан омгуудыг үй олноор хөнөөсөн", АНУ-ын түүхэн дэх "боолчлолын харгис үе" болон Хирошима, Нагасакигийн бөмбөгдөлтийн талаар эргэн сануулж "Хүн өөрөө ямар байна тэгэж л бусдыг нэрлэдэг" хэмээн нэмж өгүүлжээ.
Байден Путинийг "алуурчин" гэж цоллон, Думын дарга Ерөнхийлөгчөө өмөөрөв
Г.Бямбасүрэн