УИХ-ын чуулган, байнгын хорооны хуралдаанаар яригдаж буй асуудлуудыг сонсоход л Монголд коронавирусийн халдвар биш төрийн завхрал цар тахал болоод байгааг бэлээхэн мэдчихэж болно. Коронавирусийг далимдуулсан асар олон хууль бус шийдвэр, мөнгөний буруу эргэлт, шаардлага хангаагүй томилгоо гээд нэрлээд байвал уртаас урт жагсаалт гарна. Ковидын хуулийг далимдуулж томилсон хууль бус, шаардлага хангаагүй чихээсний томилгоогоо эцэст нь хуульд нийцүүлэх тухай УИХ дээр ярьж байна. Хэн нэгний танил тал, цүнх баригч эсвэл өрөө төлөх гэсэн нэгнээ ямар нэг байгууллагын дарга, удирдлагын суудалд ямар ч хууль дүрэмгүйгээр аваачиж тавьчихаад эцэст нь бараг тэрэндээ зориулж хууль засах бололтой. Төрийн албаны зөвлөлөөс гаргасан жагсаалтаар яамдын Төрийн нарийн бичгийн даргаас эхлээд агентлагийн удирдлагууд бүгд хууль бусаар томилогджээ.

Соёлын яам

Батлан хамгаалахын яам

Боловсрол шинжлэх ухааны яам

Эрчим хүчний яам

Эрүүл мэндийн яамны Төрийн нарийн бичгийн дарга нарын томилгоо бүгд хууль бус.

Агентлагийн дарга нар ч ялгаагүй, бүгд түр орлон тоглогчид.

Тагнуулын ерөнхий газрын дарга

Харилцаа холбоо, мэдээллийн технологийн газар

Үндэсний хөгжлийн газар,

Биеийн тамир, спортын улсын хороо

Төрийн өмчийн бодлого зохицуулалтын газар

Онцгой байдлын ерөнхий газар

Шударга өрсөлдөөн хэрэглэгчийн төлөө газар

Улсын бүртгэлийн ерөнхий газар

Усны газар

Цагдаагийн ерөнхий газар

Гадаадын иргэн харьяатын газар

Шүүхийн шийдвэр гүйцэтгэх ерөнхий газар

Эм, эмнэлгийн хэрэгслийн хяналт зохицуулалтын газар

Хөдөлмөр халамж үйлчилгээний газар

Хөгжлийн бэрхшээлтэй иргэний хөгжлийн газар

Соёл урлагийн газар

Иргэний нисэхийн ерөнхий газар

Үндэсний геологийн алба

Жижиг дунд үйлдвэрийн газар

Эрүүл мэндийн даатгалын газар

Төрийн тусгай хамгаалалтын газар

Төрийн худалдан авах ажиллагааны газар гээд 22 агентлагийн дарга нар бүгд түр үүрэг гүйцэтгэгч нэртэй. Ямар ч сонгон шалгаруулалтгүйгээр түр томилж, томилогдсон гэсэн үг. Төрийн албаны зөвлөлийн шийдвэрээр бол тэд ажлаасаа чөлөөлөгдөх ёстой. Төрийн хуулийг хүндэлж, төрийн албаны шалгалт өгөөд, нөөцөд хүлээгдэж буй мянга мянган хүний адил сонгон шалгаруулалтад орж байж дарга болохоо шийдэх учиртай. Тухайн албан тушаалын тодорхойлолтод заасан тусгай шаардлагыг хангаагүй өчнөөн дарга Монгол төрийн удирдлагын багт багтаж буй нь энэ улс хөгжихгүй, дэвшихгүй байгаагийн хангалттай шалтгаан мөн. Ажлаа мэддэггүй, чаддаггүй, хийх сэтгэлгүй хүн хөгжилд нэмэр биш чөдөр тушаа болох тодорхой.

Үхмэл, унтаа хэмээн гоочлуулдаг Төрийн албаны зөвлөл ямартай ч тогтоолоо гаргалаа. Харин одоо хэрхэн хэрэгжүүлэхийг нь харах л үлдлээ. Тус тогтоол ёсоор бол төрийн жинхэнэ албаны нөөцөд бүртгэлгүй, хууль, албан тушаалын тодорхойлолтод заасан тусгай шаардлагыг хангаагүй сонгон шалгаруулалтгүйгээр томилогдсон дээрх албан тушаалтнуудыг 2021 оны 12 дугаар сарын 31-ний өдрөөр ажил үүргийг нь тасалбар болгож, чөлөөлөх ёстой. Тэгээд тухайн албан тушаалд нээлттэй сонгон шалгаруулалт явуулж, мэдлэг, чадвар, чадал, сэтгэлтэй хүмүүсийг өрсөлдөх боломжийг нээж өгөх учиртай. Гэвч цаасан дээрх тогтоол төрийн албанд хэрэгжих эсэх нь бас л эргэлзээтэй. Анхнаасаа л Төрийн албаны зөвлөл, төрийн хуулийг үл тоож томилж, томилогдсон  том толгойтой бас ар талтай хүмүүс.

Дэлхий нийтийг цочроосон гэх сүрхий тодотголтой коронавирус манай улсад лав дараагийн бүр дараагийн асуудал боллоо. Харин төрийн завхрал бол жинхэнэ утгаараа цар тахалж болж байна.

Б.Хэрлэн