Сөргөлдөгч талуудын төлөөлөгчдийн хэлэлцээний хоёр дахь шат гуравдугаар сарын гуравны өдөр Беларусьт, орон нутгийн цагаар 17:00 цаг орчимд эхэлж, талууд гурван цагийн турш асуудлуудыг хэлэлцлээ. Анхлаад хэлэлцээг орон нутгийн цагаар 15:00 цагт эхэлнэ гэж Оросын тал мэдээлж байсан ч Украины төлөөлөгч Давид Арахамия 15:00 цагийн үед фейсбүүк хуудсандаа "хоёр цагийн дараа эхэлнэ" гэсэн пост оруулж, улмаар хэлэлцээ хоёр цаг хойшилсоны эцэст эхэлсэн юм. 

Гурван цаг үргэлжилсэн энэ хэлэлцээний дүнгээр хүссэн үр дүндээ хүрсэнгүй, гэхдээ энгийн иргэдийг нүүлгэн шилжүүлэх хүмүүнлэгийн коридор байгуулахаар тохиролцсон гэж Украины тал мэдээлсэн байна.

Тодруулбал, "нүүлгэн шилжүүлэх хэсгүүдэд түр хугацаанд гал зогсоох" боломжийг талууд тохиролцжээ. Улмаар ойрын үед харилцаа холбоо, хамтын ажиллагааны тусгай сувгууд гаргаж, тээвэрлэлтийн журмыг нэвтрүүлэхээр болсон байна.

Төлөөлөгчдийн бүрэлдэхүүний тухайд өмнөх шатны хэлэлцээнд оролцсон бүрэлдэхүүн өөрчлөгдсөнгүй. Оросын талаар Ерөнхийлөгчийн туслах Владимир Мединский, Оросын Гадаад хэргийн яамны дэд сайд Андрей Руденко, Беларусь дахь Оросын Элчин сайд Борис Грызлов, Төрийн Думын олон улсын хорооны дарга Леонид Слуцкий болон Батлан хамгаалахын дэд сайд Александр Фомин нар хэлэлцээнд оролцлоо. Украины талаас Батлан хамгаалахын сайд Алексей Резников, Дээд Рад дахь "Ард түмний зарц" фракцийн тэргүүн Давид Арахамия болон Ерөнхийлөгчийн захиргааны тэргүүн Михаил Подоляк нар оролцсон байна. 

Хэлэлцээ болж өндөрлөсний дараа Украины Ерөнхийлөгч Владимир Зеленский нуувчиндаа хэвлэлийн бага хурал зохион байгуулсан талаар Вести мэдээлсэн байна. Тэрбээр энэ үеэрээ Путинд хандан хэлэлцээний ширээний ард суухыг уриалжээ.

"Надтай хамт хэлэлцээний ширээний ард суу, би чөлөөтэй байна. Гэхдээ Макрон, Шольц нартай уулздаг шигээ 30 метрийн зайтай суух хэрэггүй, би хөрш чинь шүү дээ ! Би хазахгүй. Би давгүй эр, надтай хамт суу, ярь, чи юундаа айгаад байгаа юм?" хэмээн Зеленский мэдэгджээ. 

Лавров: Украины тал Вашингтоноос зааварчилгаа авч байна

Хоёр дахь шатны хэлэлцээг лхагва гарагт болно гэсэн мэдээлэл гарч байсан ч зохион байгуулах газрын талаар талууд тохиролцож чадаагүйн улмаас хойшлуулсан юм. Беларусийн Гадаад хэргийн яам хэлэлцээг Беловежийн төгөлд "Анчны байшин"-д болно хэмээн мэдэгдэж байлаа.

Харин лхагва гарагт Украины тал хэлэлцээ болох газар руу хүрэхэд тээвэрлэлтийн асуудлуудтай тулгарсан гэж Беларусийн улс төр судлаач Юрий Воскренский Интерфакс агентлагт мэдээлсэн байна. Хэлэлцээ өөр газар болно гэдгийг тун удалгүй Украины тал ч батлаж байв. 

"Беловежийн төгөлд хэлэлцээ болно гэсэн мэдээлэл ташаа. Хэлэлцээ үнэхээр болно, гэхдээ өөр газарт" хэмээн Давид Арахамия Фейсбүүк хуудсандаа бичиж байлаа.

Харин Оросын Гадаад хэргийн сайд Сергей Лавров Украиныг хэлэлцээг сунжруулж байгаад буруутгасан юм.

"Украины багийнхан энэ хэлэлцээг хойшлуулахын тулд дахиад л ямар нэг шалтаг олж. Тэд Вашингтоноос зааварчилгаа авч байгаа байх л даа. Энэ улс огт бие даагаагүй гэдэгт эргэлзэх юм алга, гэлээ ч хэлэлцээ болно" хэмээн Лавров мэдэгдсэн юм.

Хоёрдугаар сарын 28-ны өдөр эхэлсэн хэлэлцээний хоёр дахь шат ийнхүү дорвитой үр дүнгүй өндөрлөлөө. Дараагийн шатны хэлэлцээг ойрын үед зохион байгуулна гэдгээс өөр мэдээлэл талууд өгөөгүй байна. 

ОХУ, УКРАИНЫ: ХЭЛЭЛЦЭЭНИЙ ЭХНИЙ ШАТ ӨНДӨРЛӨВ 
 

Украин, Беларусийн хил дээр болсон Орос, Украины хэлэлцээ өндөрлөлөө. Энэ хэлэлцээ дундаа завсарлагатайгаар таван цаг үргэлжилжээ.Хоёрдугаар сарын 28-ны өдөр болсон хэлэлцээ нь гагцхүү эхний шат хэмээн талууд мэдэгдсэн юм. Дараагийн шатны хэлэлцээ нь ойрын өдрүүдэд, Польш-Беларусийн хил дээр болно гэж ОХУ-ын Ерөнхийлөгчийн туслах Владимир Мединский мэдэгджээ. ҮРГЭЛЖЛҮҮЛЭН УНШИХ 

Г.Бямбасүрэн