Оросын Ерөнхийлөгч Владимир Путин Донбассын төлөөх тулаанд ялвал Украины өөр зургаан хот руу довтлох эрмэлзэлтэй байгаа гэж Британийн Daily Mail сонин бичжээ. 

Энэ сонинд бичсэнээр, Киев, Харьков, Николаев, Одесса, Запорожье болон Днепр хот руу дайрч болзошгүй бөгөөд тиймээс дөрөвдүгээр сарын 18-ны өдөр эхэлсэн Оросын армийн дорнод чиглэлийн давшилтаас Оросын төдийгүй Украины хувь заяа шалтгаалах гэнэ. 

Daily Mail сонины нийтлэлчид Оросын цэргүүд Украиныг зүүн болон өмнөд зүгээс бүсэлж, ойрын өдрүүдэд Мариуполь хот оросуудын хяналтад орж болзошгүй хэмээн таамагласан байна. Орос Донбасс дахь Украины цэргүүдийг бүсэлж, бууж өгүүлэхээр тулгаж чадвал энэ нь Кремлийн суртал ухуулгад асах их ач холбогдолтойн дээр Украинаас Донбассыг "чөлөөлнө" гэж дайны зорилгуудынхаа нэгэнд нь хүрнэ гэж нийтлэлд онцолжээ. 

Энэ тулаанд хичнээн хохирол амссанаас хамааран Путин хүчээ зузаатган, Харьков, Днепр, Запорожье, Николаев, Одесса, Киев хот руу довтолж болзошгүй хэмээн Daily Mail мэдээлсэн байна. Ийм тохиолдолд Оростой хийх Украины дайн сар, жилээр сунжирч, Украины төрт улсын тусгаар тогтнол эргэлзээтэй болно гэж нийтлэлд бичжээ.

Харин украинчууд ялалт байгуулвал Путиний ялалтад санаархсан аливаа төлөвлөгөө талаар болж, эзлэн түрэмгийлэгчид ухарч, Крымийн нутаг дэвсгэрийг ч орхиж болзошгүй бөгөөд 2014 оноос өмнө байсан хуучин хилээ Украин эргэн сэргээх боломж олдоно гэж нийтлэлчид онцолжээ.

Энд дуулгахад, Оросын тактикийн чухал хэсэг болсон Мариуполь хотын төлөөх тулалдаан үргэлжилж байна. Украины "Азов" хорооныхон байрлаж байсан "Азовсталь" үйлдвэр рүү Оросын арми довтолж эхэлсэн бөгөөд дөрөвдүгээр сарын 20-ны 14 цаг гэхэд бууж өгч, зэвсгээ хураалгавал амийг нь өршөөнө гэж Оросын арми украинчуудад сануулсан талаар ВВС агентлаг мэдээлж байв. 

ЕХ-ны албан тушаалтан: Мариуполь хот ойрын үед оросуудад эзлэгдэх байх

Г.Бямбасүрэн