Нийслэлийн 149 усан оргилуурын 68 нь хэвийн ажилладаг

Нийслэлийн удирдлагаас Улаанбаатар хотын усан оргилууруудыг энэ сарын 20-ноос ажиллуулж эхлэх чиглэлийг өгөөд буй. Гэхдээ нийслэлд хэвийн ажиллах боломжтой усан оргилуур хэд байдаг бол? Бид энэ асуултыг Улаанбаатар хотын Захирагчийн Ажлын Албаны холбогдох албаныханд тавилаа.

Одоогийн байдлаар нийслэлд нийтийн эзэмшлийн болон хувийн буюу компанийн эзэмшлийн нийт  149 усан оргилуур бүртгэлтэй байна. Тэдгээрийн 68 нь хэвийн ажилладаг. Өөрөөр хэлбэл хотын даргын үүргийг “хэрэгжүүлэх” боломжтой гэсэн үг. Харин 49 оргилуур эвдэрсэн бол 32 нь тоо төдий, аль хэдийнэ ашиглалтаас гарчээ.

Актлах саналтай байгаа усан оргилууруудын ихэнх нь тоног төхөөрөмж буюу насос, моторын гэмтэлтэй аж. Төсвийн хөрөнгөөр усан оргилууруудыг засварладаг ч долоо хонохгүй ойр орчмын хөшөө баримлын гар хөлийг хугалах, насос мотор болон ус шахах хоолойнуудыг хулгайлах, сандал хаалт зэргийг хугалан, эвдэж сүйтгэдэг гэдгийг албаныхан учирлаж байна.  

Усан оргилуурын засвар тохижилтын ажилд нэг жилд 50 сая төгрөг төсөвлөдөг. Төсөвлөсөн хөрөнгөөс хамаараад жилд 2-3 усан оргилуурыг засварладаг байна. Өнгөрсөн онд гэхэд  Асашёорюүгийн нэрэмжит цэцэрлэгт хүрээлэн, Ардын цэцэрлэгт хүрээлэн гэсэн хоёр байршлын усан оргилуурыг засчээ.

Хонхтой цэцэрлэгт хүрээлэнгийн усан оргилуурын усыг зөөвөрлөдөг үү?

Хонхтой цэцэрлэгт хүрээлэнд 2020 онд усан оргилууртай болов. Улс орны эдийн засгийн нөхцөл байдал амаргүй үед 3.2 тэрбум төгрөгөөр байгуулагдсан усан оргилуур хийж эхэлсэн цагаасаа л хэл ам дагуулсан. Ажиллуулах болоход усыг нь зөөвөрлөж дүүргэсэн нь гал дээр тос нэмсэн үйл явдал болж байв.

Харин Улаанбаатар хотын Захирагчийн Ажлын Албаныхан ‘’Улаанбаатар хотод усаа зөөвөрлөдөг усан оргилуур огт байхгүй” гэж хэлж байна. “Нийслэлийн усан оргилуурууд бүгд төвийн шугамтай холбогдсон. Том хэмжээний оргилуурын усыг хурдан дүүргэх зорилгоор зөөвөрлөж байсан удаатай’’ гэсэн мэдээлэл өгч байна.

Нийслэлийн 9 дүүргийн усан оргилууруудын ашиглалтын байдал

Б.Намуунзаяа