Иранд өнгөрсөн сард хижабаа буруу өмссөн гэх шалтгаанаар цагдаагийнханд баривчлагдаж, улмаар цагдаагийн хэсэгт байхдаа бие нь муудаж эмнэлэгт хүргэгдсэн ч амиа алдсан Махса Амини бүсгүйн үхлийн дараа эсэргүүцлийн жагсаал өрнөж, улмаар улс орон даяар эмх замбараагүй байдал дэгдэж байв. 

Иранд эсэргүүцлийн арга хэмжээний үеэр 30 гаруй хүн амиа алджээ

Ираны эрх баригчид эсэргүүцлийн жагсаалын үеэр "хууль бус жагсаалд оролцсон хүн бүрт хариуцлага хүлээлгэнэ" хэмээн мэдэгдэж байлаа. Улмаар эмх замбараагүй байдалд оролцсон хэргээр гадаадын 14 иргэнийг баривчилжээ. Fars агентлагийн мэдээлснээр, Орос, Их Британи, АНУ, Австри, Афганистан, Франц зэрэг орны иргэд баривчлагдсан бөгөөд ихэнх нь афганчууд байсан гэнэ.

Эргэн сануулахад, есдүгээр сарын 17-ны өдөр 22 настай Махса Амини гэх бүсгүй хижаб буруу өмссөн гэх шалтгаанаар цагдаагийнханд саатуулагдсан юм. Цагдаагийн газрын мэдээлснээр, түүнээс мэдүүлэг авах үед зүрхний шигдээс болж, эмнэлэгт хүргэсэн ч эмчилгээ авч чадалгүй нас барсан. Харин олон нийтийн сүлжээнд цагдаагийнхан Аминиг зодсон гэсэн мэдээлэл гарч байлаа. Үүний дараа эмэгтэйчүүд эрхийнхээ төлөө тэмцэж, алчуураа шатаан, үсээ хайчилж эхэлсэн бол цаашлаад эсэргүүцэлд эрчүүд ч нэгдэн засгийн газраа шүүмжилж, улмаар эсэргүүцэл орон даяар өрнөн, эмх замбараагүй байдал дэгдэж байв.

Г.Бямбасүрэн