ОХУ-ын Ерөнхийлөгч Владимир Путин "супер зэвсэг" хэмээн танилцуулж байсан "Кинжал" аэробаллистик пуужин Украин дахь дайнд байгаа онох нь ховор байгаа талаар Их Британийн Батлан хамгаалахын тагнуулын тайланд өгүүлснийг Москва Таймс сонин дамжуулсан байна. 

Тагнуулын тайланд өгүүлснээр, 2023 оны наймдугаар сараас хойш, Путин хэвлэлийн бага хурал хийлгэсэн өдөр буюу 12 дугаар сарын 14-ний өдөр ОХУ анх удаа Кинжал пуужинг ашиглажээ. Тухайн үед Украины төв хэсэг рүү цэргийн нисэх буудлыг бай болгон харвасан аж. 

Украины Агаарын цэргийн хүчний мэдээлснээр, Орос, Украины дайны үеэр ОХУ щрдөө гурван Кинжал пуужин ашиглажээ. Киевийн зүгт харвасан нэг пуужинг Киев муж дахь зенит пуужингийн хэсэг амдан устгасан бол нөгөө хоёр нь хэрхсэн талаар Украины Зэвсэгт хүчин тодорхой мэдээлэл өгөөгүй юм. 

Оросын цаашдын цэргийн номлолд Кинжал пуужин чухал үүрэг гүйцэтгэхээр заасан.  Энэ пуужин нь Путин 2018 онд анх зарласан зургаан төрлийн "супер зэвсэг"-ийн жагсаалтад орж байв. Оросын арми Украинд энэ пуужинг нэн онцгой нөхцөлд буюу дайнд асар их үнэ цэнтэй, сайтар хамгаалагдсан байг устгахын тулд ашиглаж байгаа юм. Гэвч  энэ супер зэвсэг Путиний зарласан шиг "супер байгаагүй"-г Британийн тагнуул онцолсон байна. "Олон удаа хөөргөсөн ч байгаа төдийлөн оноогүй, үүний зэрэгцээ "ялагдашгүй" гэх энэ пуужинг Украин амдан устгаж чадсан" хэмээн тагнуулын тайланд өгүүлжээ.

"Кинжал" пуужин үр дүнгүй байгаа талаар өмнө нь ч Британийн тагнуул мэдээлж байсан бөгөөд пуужингууд туршилтын шатандаа явж байгаа, байлдааны нөхцөлд үр дүнтэй байх эсэх нь эргэлзээтэй хэмээн тагнуулынхан мэдэгдэж байлаа.

"Цаасан дээр бол энэ пуужинг өндөр үр дүнтэй, дуунаас хэт хурдан нисэх, орчин үеийн агаараас эсэргүүцэн хамгаалах системүүдээс ч зайлсхийх чадвартай. Харин үнэндээ бодит байдал дээр Оросын тал энэ пуужингаа сайжруулах шаардлагатай байгаа" хэмээн Британийн тагнуулынхан онцолж байсан юм.

Путин энэ пуужинг танилцуулахдаа "дууны хурдаас 10 дахин их хурдтай, нислэгийн бүхий л чиглэлд маневр хийх чадвартай, өнөөдөр болон цаашид гарах бүхий л агаараас эсэргүүцэн хамгаалах болон пуужингаас хамгаалах системийг даван туулах", цөмийн болон энгийн цэнэгт хошууг 200 км гаруй зайд тээх чадвартай хэмээн онцолж байв.

Г.Бямбасүрэн