Сүүлийн үед дэлхий даяар ядуурлын асуудлууд хурцаар тавигдаж, ядуурлыг бууруулах, ядуурлаас гарах чиглэлээр  улс орнууд, олон улсын байгууллагууд хамтран ажилласаар байна. Монгол Улсын хувьд ч мөн адил ядуурлын эсрэг, ядуурлыг бууруулахын төлөө тууштай ажиллаж байгаа. Иймд ядуурлыг бууруулах үйл ажиллагааг амжилттай хэрэгжүүлэхийн тулд ядуурлын талаарх бодитой тоо, шинэчлэх зайлшгүй шаардлага гарч байдаг.   Үүний дагуу Монгол Улсын Үндэсний статистикийн хорооноос Дэлхийн Банктай хамтран “Өрхийн нийгэм, эдийн засгийн судалгаа”-ны 2011 оны үндсэн үр дүнг танилцуулах уулзалт өнөөдөр боллоо. Уулзалтанд ядуурлын тоо мэдээллийн байнгын хэрэглэгч, бодлого боловсруулагч УИХ, ЗГ-ын гишүүд, мөн төр захиргааны   болон олон нийтийн байгууллагын төлөөлөл, Дэлхийн Банк, НҮБ-ын Хөгжлийн Хөтөлбөр, Азийн Хөгжлийн Банк зэрэг олон улсын байгууллагуудын суурин төлөөлөгчид, тус байгууллагын ажилтнууд болон судалгаа шинжилгээний байгууллагын судлаач, эрдэмтдийн төлөөлөл болсон 100 гаруй төлөөлөгчид оролцлоо.   Уулзалтыг ҮСХ-ны дарга С.Мэндсайхан, Дэлхийн банкны эдийн засагч Ш.Алтанцэцэг нар нээж үг хэлэв. Энэхүү уулзалтаар өнгөрсөн оны нэгдүгээр сарын 1-ээс арванхоёрдугаар сарын 31-ний хооронд бүтэн жилийн хугацаанд хийгдсэн өрхийн нийгэм, эдийн засгийн судалгааг танилцуулав. Ингэхдээ ядуурлын үндсэн үр дүн, тооцооны арга зүй болон судалгааны мэдээлэл дээр үндэслэн хийсэн өрхийн сууцны нөхцөл, амьжиргааны түвшин ядууралтай хэрхэн уялдаж байгаа талаар, мөн өрхийн амьжиргаанд үзүүлж байгаа нийгмийн халамжийн нөлөөллийн талаар мөн танилцууллаа.   Өрхийн нийгэм, эдийн засгийн судалгааны дүнгээс харахад Монгол улсад ядуурлын түвшин (ядуурлын хамрах хүрээ) 29.8 хувь болж 837.6 мянга орчим хүн ядууралд өртсөн байна гэсэн дүн гарчээ. Өөрөөр хэлбэл, 100 хүн тутмын 30 нь зайлшгүй шаардлагатай хүнсний болон хүнсний бус хэрэглээний зүйлийг худалдан авах чадваргүй байна гэсэн үг аж. Энэ талаарх мэдээллийг “Монгол улс дахь ядуурлын дүр төрх-Өрхийн нийгэм, эдийн засгийн судалгааны 2011 оны үр дүн”-гийн тайлан номноос үзэж болох юм байна.   П.Наран