НИТХ-ын Тэргүүлэгчдийн хуралдаан болж, Улаанбаатар хотын ерөнхий төлөвлөгөөний  тодотголыг хэлэлцэн баталлаа. Ерөнхий төлөвлөгөөнд тодотгол оруулснаар хэн нэгэн дураараа  барилга барих биш ерөнхий төлөвлөгөөнд тусгагдсаны дагуу тооцоо судалгаатайгаар нийгмийн хэрэгцээ шаардлагад нийцүүлсэн байдлаар хийх юм. Цаашид нийслэлийн хөгжил болоод нийгмийн хэрэгцээг хангахад чиглэсэн аливаа ажил хотын ерөнхий төлөвлөгөөтэй уялдсан байх бөгөөд ингэснээр эмх замбараагүй барилга байгууламж баригдахгүй, иргэдийг  ихээр бухимдуулдаг замын  түгжрэлийг багасгах боломж бүрдэх аж.  Мөн насжилт өндөртэй барилга байгууламжуудыг цэгцлэх, хотын өнгө үзэмжийг сайжруулах, аюулгүй байдлыг хангах асуудлыг  ерөнхий төлөвлөгөөнд тусгаж шийдвэрлэхээр болжээ. Улаанбаатар хотын Ерөнхий төлөвлөгөөнд тодотгол орж байгаатай уялдаад нийслэлийн газар зохион байгуулалтын ерөнхий төлөвлөгөөнд тодотгол оруулах асуудлыг мөн энэ хуралдаанаар хэлэлцэж шийдвэрлэсэн байна.  Улмаар Нийслэлийн Газрын албанаас газар зохион байгуулалтын ерөнхий төлөвлөгөөг 2025 он хүртэл гаргаж, нийт 470 мянган газрыг бүсчилэн зохион байгуулалтад оруулахаар санал боловсруулсан нь Тэргүүлэгчдийн хурлаас дэмжигджээ.   Д.Цэцэг