Шүүх хуралд УИХ-ын гишүүнийг оролцуулах хүсэлт гаргалаа
МАХН-ын дарга Н.Энхбаярт холбогдох хэргийг шүүх хурал өнөөдөр Сүхбаатар дүүргийн шүүхийн Эрүүгийн танхимд 10.00 цагаас товлогдсон юм. Хурал товлосон цагтаа эхэлж шүүх бүрэлдэхүүн өмгөөлөгч, улсын яллагч, хохирогчийн төлөөллийн хүсэлтийг сонслоо. Шүүх хурлын үеэр шүүгдэгч Н.Энхбаярын хууль ёсны өмгөөлөгч Г.Ганбаатар үйлчүүлэгчийнхээ хавтаст хэргийг түр хугацаагаар түдгэлзүүлж өгнө үү гэсэн хүсэлтийг уламжилсан байна. Харин улсын яллагч Е.Сагсай, Г.Мөнхбаатар нар "Н.Энхбаярт холбогдох хэргийг шүүх хугацааг хойшлуулж өгнө үү” гэв. Түүнчлэн До.Чулуунбаатарын өмгөөлөгч Г.Өлзийхүү УИХ-ын гишүүн Х.Наранхүүг хуралд гэрчээр оролцуулах хүсэлтэй байгаагаа илэрхийлсэн байна.
Уг хуралд даргалагч шүүгчээр С.Соёмбо-Эрдэнэ, шүүгчээр М.Алдар, С.Оюунчимэг нар оролцсон бол хяналтын прокуророор Е.Сагсай, Г.Мөнхбаатар, шүүгдэгчийн өмгөөлөгчөөр Н.Шинэн, Г.Ганбаатар нар оролцов. Шүүх бүрэлдэхүүн улсын яллагч, өмгөөлөгчийн хүсэлтүүдийг хагас цаг хэлэлцсэний эцэст хурлыг хойшлуулах шийдвэр гаргалаа.
Ингэхдээ Клиникийн хоёрдугаар эмнэлгийн даргын дүгнэлтээр шүүгдэгч Н.Энхбаярын эрүүл мэндийн байдлын улмаас хуралд оролцуулах боломжгүй гэсэн дүгнэлт гарсан нь хурлыг ирэх зургадугаар сарын 4-ний өдрийг хүртэл хойшлуулах үндэслэл болсон гэв. Мөн өмгөөлөгч Г.Ганбаатарын гаргасан хүсэлтийг хангах боломжгүй гэж үзлээ. Хурал хойшилсны дараа Н.Энхбаярын өмгөөлөгч Г.Ганбаатараас дараахи асуултад хариулт авлаа.
-Яагаад үйлчлүүлэгчийнхээ хэргийг түдгэлзүүлэх хүсэлт гаргав?
-Миний үйлчлүүлэгчийн эрүүл мэндийн байдал муу байгаа. Хуульд зааснаар бол шүүгдэгчийн эрүүл мэндийн байдал муудсан тохиолдолд хэргийг түдгэлзүүлж болдог. Харамсалтай нь бүрэлдэхүүн миний тавьсан хүсэлтийг хангасангүй.
Дараагийн шүүх хуралд Н.Энхбаяр оролцох боломжтой юу?
-Ирэх зургадугаар сарын 4-ний өдрийг хүртэл эрүүл мэндийн байдал нь сайжирвал оролцох байх.
-Хавтаст хэрэгтэйгээ бүрэн танилцсан уу. Ирэх шүүх хурал хүртэл Н.Энхбаяр хэрэгтэйгээ танилцаж амжих уу?
-Шүүхээс хавтаст хэрэгтэй танилцах үүрэг өглөө. Ер нь хэрэгтэй нь танилцсан.
Н.Энхбаярын хүү Э.Батшугар хурлын үеэр сэтгүүлчдийн асуултад хариуллаа.
-Аавтайгаа уулзсан хэр нь уулзаагүй гэсэн мэдээлэл хийсэн нь ямар учиртай юм бэ. Худал мэдээлэл цацсан шалтгаан нь юу вэ?
-Сэтгүүлчдэд энэ талаар долоо хоногийн сүүлээр дэлгэрэнгүй мэдээлэл өгнө. Нэг бүрчлэн мэдээлэл өгөх учраас та бүхэн түр хүлээнэ үү гэж хүсье.
-Ирэх зургадугаар сард болох шүүх хуралд оролцох уу?
- Шүүх хуралд оролцох эсэхийг өнөөдөр хэлж мэдэхгүй.
Н.Түвшин
СЭТГЭГДЭЛ БИЧИХ