“Их монголын алтан одод-2” сагсан бөмбөгийн шоу тоглолт Монгол бөхийн өргөөнөө амжилттай болж өндөрлөлөө. Тус сагсан бөмбөгийн шоу тоглолт үндсэн хоёр хэсгээс бүрдсэн бөгөөд эхний хэсэгт урлаг, спортынхон  өрсөлдсөн бол хоёрдугаар хэсэгт сумочид болон үндэсний бөхчүүд хоорондоо өрсөлдсөн юм.Энэхүү тоглолтооос олсон орлогоороо Эх хүүхдийн эрүүл мэндийн үндэсний төвд 20 сая  төгрөгийн  тоног төхөөрөмж бэлэглсэн бол хүүхэд асран хүмүүжүүлэх төвийн 1000 хүүхдэд “Эх үрсийн баяр”-ыг тохиолдуулан хичээлийн хэрэгсэл гардуулсан юм. Тус тэмцээний бас нэгэн чимэг нь МУГЖ Д.Жаргалсайхан байсан бөгөөд тус тэмцээнийг нээж “Тамирчны алдар дуугаар эхлүүлсэн нь олон хүний тэр дундаа Мөнхбат аваргын сэтгэлийг догдлуулж уйлуулж чадсан юм. Тус тоглолтын ивээн тэтгэгчээр Хакухо сан, Үндэсний шилдэг үйлдвэрлэгч “Мон Лаа” компани, сагсан бөмбөгийн “TLG-13” ТББ, олимпийн аварга Э.Бадар-Ууган, дэлхийн аварга Х.Цагаанбаатар, гавьяат тамирчин Б.Наранбаатар нарын үүсгэн байгуулсан “Амжилтын төлөө хамтдаа” ТББ-ууд хамтран амжилттай зохион байгууллаа. Хакухо М. Даваажаргалаар ахлуулсан сумочдын багт озэки Харумафүжи Д.Бямбадорж, какурюү М.Ананд, кёкютенхо Н.Цэвэгням  Рюүо Э.Санчирболд, Кёкүшюхо Т.Эрдэнэбаатар, Токитэнкү А.Хүчитбаатар, Асасекүрюү Дашням нарын тэргүүтэй сумочид багтсан бол тэдний өрсөлдөгчөөр үндэсний бөхчүүдийн багт Даян аварга Г.Өсөхбаяр, аварга С.Мөнхбат, арслан Х.Мөнхбаатар, Д.Ганхуяг, гарьд Н.Ганбаатар, Ж.Бат-Эрдэнэ, улсын заан Д.Рагчаа, М.Өсөхбаяр, Ч.Санжаадамба нарын цолтнууд байлаа. Ийнхүү дэвжээн дээр болон зүлэг ногоон талбайд уран мэхийг гайхуулан барилддаг бөхчүүд нэгэн оройг сагсан бөмбөгийн талбайд өнгөрүүллээ. Кёкүтэнхо Н.Цэвэгням тоглолтын өмнө “сагс тоглохдоо ч муу даа” хэмээн инээмсэглэж байсан ч шаггүй сагсчин болохоо энэ удаагийн тэмцээнээрээ харуулж чадсан юм. Мэргэжлийн сумогийн их аварга Хакухо М.Даваажаргал 2005 анх тус тэмцээнийг зохион байгуулж байхад анхны тэмцээндээ дөрвөн  оноогоор илүүрхэн ялалт байгуулж байсан бол энэ удаа найман оноогоор хожих болно хэмээн ам гарсан юм. Гэсэн ч 33:18-ын  харьцаатайгаар үндэсний бөхчүүд илт давуугаар хожсон билээ. Тоглолтын дундуур багуудын хооронд олон сонирхолтой тэмцээнүүд явуулж бөхчүүдийн хурд хүч авхаалж самбааг сорьсон олон сонирхолтой тэмцээнүүд явуулж байсан нь үзэгчдэд таалагдсан. Энэ үед сумочид ба үндэсний бөхчүүдийн дунд олс таталтын тэмцээн зохиосон бөгөөд сумочдын баг хүч илүүгээр багтаа ялалт авчирч байлаа. Харин урлаг, спортын холимог оддын тоглолтод олимпийн аварга Н. Түвшинбаяр, Э. Бадар-Ууган, Х.Цагаанбаатар нарын тамирчид болон урлаг нийгмийн салбарын алдартнууд оролцож, хүүхдийн сайн сайхны төлөөх буяны үйлсэд нэгэн үдэш нэгдсэн юм. Н.Ариунаа А.Сувд