Украйны парламентын гишүүд нударга зөрүүлжээ. Тэд Орос хэлийг үндсэн хэлээ болгох, үгүй эсэх талаар хэлэлцэж байсан ч, мэтгэлцээн маргаан ширүүсч улмаар зодоон болон хувирчээ Өнгөрсөн мягмар гаригт Украйны Рада буюу парламент нутгийн зарим хэсэгт Орос хэлийг үндсэн хэл болгон ашиглах талаар хэлэлцжээ. Энэ үеэр Оросын талыг баримтлагч Украйны ерөнхийлөгч Виктор Януковичийг дэмжигчид  болон барууны талыг баримтлагч гишүүдийн хооронд маргаан болж, парламентын гишүүд нударга зөрүүлсэн байна. Ерөнхий сайд асан Тимошенкогийн талыг баримтлагчид Украйн улс хэл соёлын хувьд хүчирхэг хөрш ОХУ-аас бүрэн хараат бус байх ёстой гэж үзэж байгаа бол ерөнхийлөгч Виктор Януковичийн талын баримтлагчид Украйны зарим хэсэгт Орос хэлийг үндсэн хэл болгох байр сууртай байгаа юм. Учир нь эмнэлэг, сургууль, шүүх байгууллага зэрэг олон нийтийн үйлчилгээний газрын ихэнх нь Орос хэлээр ярьдаг. Барууны талыг баримтлагч ерөнхийлөгч Янукович ирэх 10 сард болох парламентын сонгуулиас өмнө Украйныг хэл соёлоор нь 2 хуваах гэж байна. Цаашлаад Украйны хэл соёлыг устгах, Орост уусгах гэж байна гэж үзэн хуулийн төслийг хүчтэй эсэргүүцсэн байна. Украйн хэл нь Орос хэлтэй адил Слав язгуурын хэлэнд багтдаг ч бага зэрэг ялгаатай, цөөн латин үсэг хэрэглэдэг. Слав язгуур нь Энэтхэг-Европын язгуурын дэд язгуур юм. Дотроо зүүн, баруун болон өмнөд Слав хэл гэж хуваагддаг байна. Украйны хувьд Донецк хот орчим буюу нутгийн зүүн хэсгийн оршин суугчид, мөн өмнөд хэсэгт орших Крым Автономит улсын оршин суугчид Оросоор ярьдаг. Эдгээр оршин суугчид одоогийн Ерөнхийлөгч Виктор Януковичийг дэмждэг юм. Тэгэхээр Ерөнхийлөгч Янукович өөрийг нь дэмждэг оршин суугчидтай бүс нутагт Орос хэлийг үндсэн хэл болгож, оноо авч нэр хүндээ өсгөх гэсэн алхам хийж байна гэж сөрөг хүчин үзэж байгаа юм. Парламентын гишүүдийн зодооны үеэр сөрөг хүчний улс төрч Микола Петру толгойдоо гэмтэл аван эмнэлэгт хүргэгджээ. Н.Эдди