Элчин сайдууд итгэмжлэх жуух бичгээ өргөн барив

img

Өнөөдөр Монгол Улсын Ерөнхийлөгч Ц.Элбэгдоржид Бүгд Найрамдах Испани Улсаас Монгол Улсад суух Онц бөгөөд бүрэн эрхт Элчин сайд Иугенио Бреголат Овиолис, Бүгд Найрамдах Ардчилсан Социалист Шри-Ланка Улсаас Монгол Улсад хавсран суух Онц бөгөөд Бүрэн эрхт Элчин сайд Ранжит Уянгода болон Бүгд Найрамдах Азербайжан Улсаас Монгол Улсад суух Онц бөгөөд Бүрэн эрхт Элчин сайд Латиф Сейф Аддин нар Итгэмжлэх жуух бичгээ өргөн барилаа. Дараа нь Элчин сайд нарыг Итгэмжлэх жуух бичгээ өргөн барьсантай нь холбогдуулан Монгол Улсын Ерөнхийлөгч Ц.Элбэгдорж хүлээн авч уулзав. Уулзалтын үеэр БНИУ-аас Монгол Улсад суух Онц бөгөөд Бүрэн эрх Элчин сайд И.Б.Овиолис хэлэхдээ “Би 1978 онд Олон Улсын Олимпийн Хорооны Ерөнхийлөгч Хуан Антонио Самаранчийн туслахаар ажиллаж байхдаа анх удаа Монгол Улсад хөл тавьж байлаа. Түүнээс хойш Монгол Улс маш их өөрчлөгдөж хөгжин дэвшсэн байна” хэмээгээд хоёр улсын хоорондох дипломат харилцааг бүхий л талаар өргөжүүлэн хөгжүүлэхийг зорьж ирсэн, цаашид ч хичээн ажиллахаа илэрхийлэв. Дараа нь БНАСШУ-аас Монгол Улсад хавсран суух Элчин сайд Р.Уянгода Монгол Улсын Ерөнхийлөгчид хандан “2012 онд хоёр улсын хооронд дипломат харилцаа тогтоосны 50 жилийн ойгоор ийнхүү Итгэмжлэх жуух бичгээ өргөн барьж буйдаа баяртай байна. Манай хоёр орон буддын шашны уламжлалаараа нэн эртнээс холбоотой, найрсаг ард түмнүүд юм. Цаашид энэ харилцааг гүнзгийрүүлэхийн тулд идэвхитэй хамтран ажиллах болно” хэмээв. Мөн Бүгд Найрамдах Азербайжан Улсаас Монгол Улсад суух Элчин сайд Л.С.Аддин Монгол Улсын Ерөнхийлөгчид хандан итгэмжлэх жуух бичгий нь хүлээн авсанд талархал илэрхийлэв. Элчин сайд Аддин хэлэхдээ Азербайжан Улс нь Монгол Улстай бүхий л талаар найрсаг түвшинд харилцаа, хамтын ажиллагаагаа бэхжүүлж ирлээ. Бид цаашид махны импортлох болон нефтийн салбарт илүү түлхүү хамтран ажиллах сонирхолтой байна гэв. Монгол Улсын Ерөнхийлөгч Ц.Элбэгдорж улс орноо төлөөлөн Монгол Улсад суух Онц бөгөөд Бүрэн эрхт Элчин сайдаар томилогдсон Элчин сайд нарт баяр хүргээд эдгээр улстай дипломат харицлаагаа улам бүр гүнзгийрүүлэн хамтын ажиллагаагаа олон салбарт өргөжүүлэх нь Монгол Улсын гадаад бодлогын нэгэн чухал хэсэг гэдгийг онцлож байв.   Д.Цэцэг  

СЭТГЭГДЭЛ БИЧИХ