Галт зэвсэгийн тухай хуульд нэмэлт өөрчлөлт оруулах эсэх асуудлыг Хууль зүйн байнгын хорооноос ажлын хэсэгт буцаалаа. Уг хуулийн төслийг ажлын хэсэгт буцаа саналыг АН-ын бүлгийн гишүүд гаргасан юм. Уг хуулийн төслийн талаар Р.Гончигдорж “Онц байдал зарласан үед цагдаа нарт галт зэвсэг хэрэглэхийг зөвшөөрөх юм уу, эсвэл гарахаас урьдчилан сэргийлэхийн тулд ашиглах юм уу. Энэ мэт олон асуудлыг нарийвчилан тусгаагүй байна. Тиймээс энэ төслийг буцаах саналтай байна гэв. Харин Н.Батбаяр “Жагсаал цуглаан үед жирийн иргэнийхээ эсрэг буудах эрхийг цагдаа нарт өгч байх шиг байна.

Ийм хууль дэлхийн аль ч оронд байхгүй. Бусад улсууд онцгой байдлын үед усан буу, бороохой зэргийг ашигладаг. Гэтэл манай улс ий хуултай болох гэж байх шиг байна. Тэгээд энэ буудах эрхийг нь хэн өгөх нь тодорхойгүй байна. Ийм зүйлээ орхигдуулж болдог юм уу. Энэ тушаалыг Д.Сандаг-Очир өгөх юм уу, Ц.Нямдорж өгөх юм уу.  Салбар толгойлж байгаагаар нь Ц.Нямдоржид өгөх юм уу. Ц.Нямдорж чинь омголон хүн шүү дээ. Шатар тоглож байгаад хожигдохоороо шатраа шидчихдэг хүн шүү дээ. Ийм асуудлыг нээлттэй орхиж болохгүй. Ж.Сүхбаатар чинь УИХ-ын гайгүй гишүүдийн нэг.

Ийм хуулийн төсөл оруулж ирж байгааг гайхаж байна. УИХ-ын энэ хуулийн төсөлд хандаж байгаа хандлагыг харахад МАН-ынхан ард түмнийхээ эсрэг  байгаа юм байна. Манай бүлгийн гишүүд ард түмнээ өмгөөлье гэж байна” гэв. Түүний энэ үгийг сонссон МАН-ын гишүүд Н.Батбаяраа асуудлаа битгий улстөржүүлээд бай” гэлээ. Энэ мэтчилэнгээр асуулт, хариулт үргэлжилсээр Галт зэвсэгийн тухай хуульд нэмэлт өөрчлөлт оруулах эсэх тухай хуулийн төслийг ажлын хэсэгт буцааж, дахин боловсруулахаар боллоо.