УИХ-ын ээлжит сонгуулийн үеэр дахин чуулган хуралдахгүй гэх захирамжийг өнөөдөр УИХ-ын дарга Д.Дэмбэрэл гаргалаа. Өнгөрсөн хугацаанд Д.Дэмбэрэлийн ангийнхан хэр үр бүтээлтэй ажилласныг эргэн нэг дүгнэе.Таван хүний амь эрсдэж, Монголын түүхэнд хараар тэмдэглэгдэн үлдсэн сонгуулийн үр дүнгээр бүрдсэн парламент гэгддэг энэ удаагийн УИХ 2008 онд МАН 46, АН 23, Иргэний зориг нам, Монголын ногоон нам, бие даагч тус тус нэг суудал авч бүрдсэн билээ.Сайн, муугаар хослуулан дуудуулсан энэ парламент өнгөрсөн дөрвөн жилийн хугацаанд бие даасан 111 хуулийг гаргаж, 484 хуульд нэмэлт, өөрчлөлт оруулж, 350 тогтоол, 35 бодлогын баримт бичиг, 59 олон улсын гэрээ хэлэлцээрийг баталжээ.2008 онд  манай улсын нэгдсэн төсөв 2.1 их наяд төгрөг байсан. Харин энэ жилийн хувьд дээрх үзүүлэлт 6.8 их наяд төгрөг болоод байна. Энэ өсөлтөд мэдээж хамгийн ихээр нөлөөлсөн хүчин зүйл бол Тавантолгой, Оюутолгой байлаа.2008-2012 оны парламентын бүрэн эрхийн хугацаа эхлэх үед дэлхий дахинд эдийн засгийн хямрал нөлөөлж, үүний нөлөөгөөр манай улсын банк, санхүүгийн салбарт аюулын харанга дэлдэж байсан.Гэхдээ манай улсын Засгийн газар, Төв банк олон улсын байгууллагуудтай хамтран ажиллаж, дээрх хямралыг амжилттай давсан орнуудын нэгээр нэрлэгдэж чадсан юм.Үүнийг даган манай улсыг чиглэх хөрөнгө оруулалтын хэмжээ чамгүй нэмэгдсэн. Тодруулбал, өнгөрсөн дөрвөн жилийн хугацаанд улсын хэмжээнд гурван их наяд төгрөгийн хөрөнгө оруулалт хийгджээ. УИХ-ын Тамгын газраас ирүүлсэн мэдээллээр дээрх хөрөнгийн эх үүсвэрээр 1486 км засмал зам барьж, 1456 км замын ажлыг эхлүүлээд байгаа аж. Мөн эрчим хүчний 120 дэд станц бүхий 5634 км өндөр хүчдлийн шугам барьжээ. Үүний дотор мэдээж тодоор тэмдэглэгдэх зүйл Оюутолгой, Таван толгойн стратегийн ордуудыг эдийн засгийн эргэлтэд оруулсан явдал байв. Мөн сүүлийн 20 гаруй жилд орхигдоод байсан мал, малчин руу чиглэсэн бодлогыг тодорхойлжээ. Үр дүнд нь энэ оны төлийг оролцуулаад монголчууд 50 сая малтай боллоо. Өрхийн сарын дундаж орлого 2008 оныхоос 2.2 дахин нэмэгджээ. Улсын хэмжээгээр 2008 онд дундаж цалин 250 мянган төгрөг байсан бол 500 мянган төгрөг болж хоёр дахин нэмэгджээ. Харин төсөвт байгууллагад ажиллагсдын сарын цалин 300 мянган төгрөгөөс 630 мянган төгрөгт хүрсэн. Ахмадын тэтгэвэр 2.2 дахин өсч доод хэмжээ нь 2008 онд 80 мянган төгрөг байснаа 180 мянган төгрөг боллоо. Оюутнууд сар тутам 70 мянган төгрөгийн тэтгэлэгтэй суралцаж байна. Иргэдэд 1.5 сая төгрөг олгох амлалт биеллээ олж байна. 250 мянган хүн шинээр ажлын байртай болсон хэмээн зарлаж байна. Гадаад харилцааны хувьд манай улс өнгөрсөн дөрвөн жилийн хугацаанд 13 оронтой дипломат харилцаа шинээр тогтоож, дэлхийн 163 улстай дипломат харилцаатай боллоо. Ялсан, ялагдсан хоёр нийлж Засаг байгуулж, дотооддоо хяналтгүй дөрвөн жилийг үдлээ гэх шүүмжлэлд өртсөн 2008-2012 оны парламентын өөр нэг гавъяа нь ирэх сард болох сонгуулийн “тоглоомын дүрэм”-ийг баталсан явдал байв. Уг  хуулийн чанарын үр дүнг бид удахгүй харна. 2008 оны сонгуулийн үр дүн хүлээн зөвшөөрөгдөхгүй гараа муутай үйл ажиллагаагаа эхлүүлж байсан Д.Дэмбэрэлийн ангийнхан хийсэн ажлаа ард түмэндээ дүгнүүлэн, ирэх сонгуулийн үр дүнгийн дараа шинэ танхимынханд ажлаа хүлээлгэн өгөхөд бэлэн болжээ. У.Жигүүр