ЮНЕСКО-гийн “Биет бус соёлын өвийг хамгаалах тухай” конвенцийн Ерөнхий бага хурлын ээлжит IV чуулган ирэх сард Парис хотноо хуралдана. Энэ үеэр ЮНЕСКО-ийн ерөнхий нарийн бичгийн дарга Ирина Боковагийн санаачлагаар “Монгол костюмс” төвийн “Монгол хувцасны нууц товчоо” загварын түүхчилсэн тоглолт тоглогдохоор болжээ.   ЮНЕСКО-гийн төв байранд болох энэхүү арга хэмжээнд Монгол хувцасны бахархам түүхэн өв соёлыг илэрхийлсэн үзүүлбэрүүдийг толилуулах аж. Энэ үеэр хадны сүг зураг амилж, Хүннү төрийн төрт ёсны хувцас өмсгөл, Эзэнт гүрний хүчирхэг хаад, эрхэмсэг хатад, дайчин баатрууд, Богд гэгээнтэн, Дондогдулам хатны ур ухаан, учиг шаглаа шингэсэн тансаг хувцас зүүсгэл, Монголын олон ястнуудын өөр өөрийн өвөрмөц содон дээл хувцасны дэг ёсыг олны хүртээл болгох юм байна. Энэхүү тоглолт бүтэн нэг цаг үргэлжлэх бөгөөд тоглолтонд оролцох 27 уран бүтээлч маргааш Франц улсын нийслэл Парисыг зорих аж.   П.Наран