АНУ-ын Даллас хотын шүүх Монголоос олдсон болох нь батлагдсан Тиранозаурус Батаарыг эх оронд нь шилжүүлэх шийдвэрийг өнгөрсөн долоо хоногт гаргажээ. Улмаар энэ сарын 22-нд Нью-Йорк хотын Кюинс дүүрэг дэх агуулахын байранд хадгалагдаж байгаа олдворыг  АНУ-ын Засгийн газар хамгаалалтанд авсан байна. Дуудлага худалдаагаар зарагдах гэж байсан Тироназаурус Батаарыг удахгүй эх оронд нь авчрахаар болжээ. Шүүх хуралд Монголыг төлөөлж АНУ-ын хуульч Роберт Пайнтер болон палеонтологич М.Болорцэцэг нар оролцсон аж. Манай талаас 1921 оноос хойшхи бүх Үндсэн хууль, эрүүгийн хуулийг АНУ-ын шүүх рүү явуулсан байна. Ингэснээр 1924 оноос хойшхи хуулиудад “Ийм олдворууд төрийн өмч бөгөөд ард түмний хамгаалалтад байна” гэсэн заалтууд байгаа нь олдворыг Монголын хуулийг зөрчиж гаргасан, АНУ-руу хууль бусаар зарах гэж байсныг нотолж байгаа билээ. Дашрамд дурдахад ийм төрлийн хууль бус аргаар урьд нь динозаврын ясыг гаргаж байсан юм байна. Манай улсад нийт 80 гаруй төрлийн динозавр байсан гэнэ.   Э.Сувд