Бүх нийтээр мод тарих хөдөлгөөнийг эрчимжүүлэхээр Байгаль хамгаалах намрын сарын аяны хүрээнд орчноо цэцэрлэгжүүлэх, мод тарих ажлыг Ховд аймгийн БОАЖГ-аас өрнүүллээ. Намрын тариалалтад 71 байгууллага, 1694 хүн оролцож, нийт 13900 мод бут  тарилаа. Эдгээрийг албан байгууллага, ард иргэд өөрийн эзэмшил ашиглалтад байгаа газартаа болон тариалангийн талбайн хамгаалалтын зурваст тарьж, 59410 мянган төгрөгийн зардал гаргасан байна. Намрын ажилд 14 сум идэвхийлэн оролцсоноос Булган сум 5000 ш, Mянгад сум 4000 ш, Жаргалант сум 1030 мод тарьсан үр дүнгээрээ хошуучлав. Үр дүнтэй, санаачилгатай ажилласан жишээнээс онцолбол, Булган сумын иргэн С.Хасгаа 2500 бургас, хайлаасны суулгацыг сумын ЗДТГ-т үнэгүй өгч тариулсан бол Мянгад сум  “Дэлхийн зөн” ОУБ-аас өгсөн чацарганы 4000 ш суулгац, 600 ш модон шон, 1000 урттай төмөр тор зэрэг 18.5 сая төгрөгийн өртөгтэй зүйлсийг ашиглан Өндөр элсний тохой, Хасаг гаталганы аманд хоёр хэсэг газрыг торлон хамгаалж, дээрх 4000 чацарганыг тарьсан байна. Мөн энэ онд нийтийн эзэмшлийн ногоон байгууламжийн хэмжээг өргөжүүлж 7335 ам метр цэцгийн мандал, ногоон байгууламж шинээр хийлээ. Аймгийн нийтийн эзэмшлийн ногоон байгууламжийн хэмжээг энэ жил нарийвчлан тоолсон. Тооллогын дүнгээр, энэ оны тариалалтыг оролцуулаад ургамлан хашлага /харгана, шар хуйс, тэхийн шээгээр хийсэн/ 1680м, зүлэгжүүлсэн нийт талбай 26609.9 м2, таримал мод бут 45215ш, сүүдрэвч 23ш, цэцгийн мандал 379ш байгааг тогтоов. Эдгээрийг нэгтгэхэд, Ховд аймгийн нэг хүнд 0.3 ам метр ногоон байгууламж ногдож байна. Өнгөрсөн жилийн мөн үеийнхтэй харьцуулахад төв суурины ногоон байгууламжийн хэмжээ нэмэгдсэн байна. Тодруулбал, ургамлан хашлага 59 уртаашаа метр, зүлэгт талбай 16038.9м2, мод сөөг 6000ш, цэцгийн мандал 126ш, нэг хүнд ногдох ногоон байгууламжийн хэмжээ 0.5 м2  тус тус өсчээ. Сумдаас ирсэн мэдээг нэгтгэхэд аймгийн дүнгээр хавар, намрын тариалалтаар 2011 онд нийт 229 байгууллага, 5710 хүн, 41924 мод бутыг албан байгууллага, ард иргэд өөрийн эзэмшил, ашиглалтын газар болон тариалангийн талбайн хамгаалалтын зурваст тарьжээ гэж Ховд аймгийн БОАЖГ-ын мэргэжилтэн Ц.Гантулга мэдээллээ.