Ираны армийн генерал Амир Али Хажизаде лхагва гаригт нэгэн томоохон мэдэгдэл хийсэн нь шуугиан дэгдээж байна. Ираны “Фарс” агентлагт англи хэлээр өгсөн мэдэгдэлдээ “Ираны эргэн тойронд байгаа АНУ-ын 35 цэргийн баазууд бүгд манай пуужингийн хараанд байгаа. Ямар нэг дайралт хийхэд л эхний минутад бүгдийг нь устгах чадалтай. Тэдгээр цэргийн баазууд Ираны армид заналхийлэл биш, харин ч сайхан завшаан болж байгаа юм” хэмээсэн байна. Хажизадегийн энэхүү мэдэгдэл Ираны арми цөлд байрлах дайсны баазууд руу пуужин хөөргөхөд бэлэн болгож, томоохон цэргийн сургуулилт хийж байхтай давхцсан юм. Генерал Хусейн Салами мягмар гаригт өгсөн зурагтын ярилцлагадаа “Цэргийн сургуулилтын гол зорилго нь Иран улс өөрийн үндэсний хэм хэмжээ, сонирхлоо хамгаалах шийдэмгий байдлыг харуулахад оршиж байгаа юм” гэлээ. Уг телевиз түүний мэдэгдлийг Иранд цэргийн ажиллагаа явуулна гэж сүрдүүлсэн орнуудад хатуухан хариу боллоо гэж дүгнэжээ. Хэдэн жилийн турш АНУ болон Израйль улсууд цөмийн баяжуулалтын хөтөлбөрөөс нь үүдэн Ирантай тэмцэлдэж байгаа бөгөөд, Иран улс цөмийн зэвсэг хийж байгаа нь баттай болвол цэргийн арга хэмжээ авахаа хоёр улсын удирдагчид мэдэгдээд байгаа билээ. Харин Ираны албаныхан “Цөмийн зэвсэг хийгээгүй, зөвхөн дотооддоо цөмийн эрчим хүчтэй болох зорилгоор л уран баяжуулан гаргаж байгаа” хэмээн мэдэгдсэн юм. Тус телевизийн мэдээлснээр Ираны арми хэд хэдэн төрлийн пуужинг туршиж үзсэн бөгөөд тэдний нэг болох Шабаб–3 пуужин ойрын 900 бээрийн зайд хүрэх чадалтай гэнэ. Энэ нь Ойрхи Дорнод даяар хүрэх тусгалтай гэсэн үг юм. АНУ болон түүний холбоотон орнууд тус бүс нутагт хэд хэдэн цэргийн баазтай бөгөөд, түүний нэг болох Тэнгисийн 5-р флот л гэхэд Ираны өмнөд хилээс 120 бээрийн зайд байрладаг юм. Израйлийн зүүн хил Ираны эх газраас ойролцоогоор 600 бээрийн зайд байдаг аж. Мөн АНУ болон Арабын Нэгдсэн Эмиратын Ал Дафра агаарын бааз Ираны өмнөд эргээс 200 бээрийн зайд оршдог билээ. (AP) Ц.Мишээл