Олон нийт МАХН-ыг УИХ-д цөөнгүй суудалтай болж, АН-тай эвсэж магадгүй сургаар Н.Энхбаярын хувь заяа хэрхэх бол гэсэн тааврыг дэвшүүлж байна. Нэг үеэ бодоход Монгол Улсад шударга ёс тогтож байна. Хориодхон настай аймгийн цолтой хүү улсын аварга, арслан, заануудаас эмээлгүйгээр түрүүлж, авлига хээл хахуульд автсан албан тушаалтнууд эхнээсээ ял зэмээ хүртэн хууль хяналтын байгууллагууд шударгаар ажиллаж эхэлж байна. Мэдээж хэрэг хуулийнхан ямар нэгэн наадам, аль нэгэн сонгуулиас үл хамаарч ажил хэргээ хуулийн дагуу хийх нь тодорхой. Ийм ч учраас хэзээ нэгэн цагт ямар ч байсан Н.Энхбаярын зөв, бурууг дэнслэх нь дамжиггүй. Үүнийг зөвхөн шүүх л шийднэ. Н.Энхбаяр бол яаж ч жүжиглэж, юу ч хийж магадгүй. Ямартаа ч түүнээс болоод нэг хэсэг Монголын нэр хүнд гадаад ертөнцөд буруутах шахсан. Эхнэрийнх нь Англи руу бичсэн захидал л гэхэд эрүүл хүний санаанд багтамгүй гүжир гүтгэлгээр дүүрэн байлаа. Арван настай охиных нь амь насанд төр заналхийлж, нөхрийг нь шалдлан нүцгэн хоригдлуудын дунд тарчлаан, эрүү шүүлт тулгаж байна хэмээн дэлхий дахинд цацсан авгай шүү дээ. Мөн МАХН-ын ерөнхий нарийн бичгийн дарга Н.Удвал “Нью-Йорк Таймс” сонинд 150 мянган долларын төлбөртэйгээр ил захидал нийтлүүлж байв. Түүгээр ч үл барам Н.Энхбаярын сая доллараар хөлсөлсөн Питер Голдсмит гэгч өмгөөлөгч нь Монголын нэр хүндийг гутаахаар дэлхийн олон улс оронд очсон байдаг. Н.Энхбаяр хуучин юм ул болж, хууль хэрэгждэг болсныг сайтар ойлгож байгаа. Тиймээс зүгээр суугаагүй нь ойлгомжтой. Биднийг наадамлаж байх хоорондуур мань эр “Айвенхоу Майнз”-ын хорт Боб хочит Роберт Фрийдландтай хамсан Монголын нэр хүндийг унагаахаар ажиллаж эхэлжээ. Хэн гэдгээс үл хамааран эх сурвалжийн өгүүлж байгаагаар энэ хоёр эрхэм хүч хавсран Монгол төрийг гутаах ажлынхаа төлөвлөгөөг гаргасан гэнэ. Удахгүй энэ нь батлагдах болно доо. Энэ хоёр этгээд яагаад холбогдох болов. Н.Энхбаяр Орост төлөх их өрийг тэглэнэ хэмээн 50 сая доллар зувчуулахдаа энэ мөнгийг Фрийдландаас зээлсэн байдаг. Үүнийхээ хажуугаар Фрийдландад Оюутолгойн ашиглалтын лицензийг олгож, нэг дор дөчөөд лиценз нэмж олгосон гээд бод доо. Өнөөдөр АТГ-аас өмнийн говийг тэр чигээр нь шахам эзэмшиж байгаа Фрийдландын “Саусгоби сэндс”-ийг шалгаж байгаа. Учир нь уг компаниа Фрийдланд Хятадын төрийн мэдлийн “Чалко”-д 800 сая ам.доллараар зарахаар болж байгаа. Иймээс Фрийдланд Монголын Засгийн газарт гаднаас шахалт үзүүлж, дахин тэрбум доллараар халаасаа түнтийлгэх, харин Н.Энхбаяр уг шахалтын дор ял завших оролдлого хийж байгаа. Ёстой л “Ороо нь ороогоороо, жороо нь жороогоороо” гэдэг энэ буюу. Н.Энхбаяр эрх чөлөөгөө хасуулбал Фрийдланд хохирох гээд байгаа нь энэ. Харин Н.Энхбаяр эрх мэдлийн оргилд дахин гарвал ноён Фрийдланд өмнийн говийг тэр чигээр нь арилжиж, хөрөнгө зоорио тэрбум тэрбумаар нь нэмэгдүүлнэ. Тиймээс энэ хоёр Сиамын ихэр гэсэн үг. Ямартаа ч энэ хоёрын хуйвалдаан энэ намрын хүндхэн асуудлыг үүсгэх биз ээ. Монголын нэр хүндийг дэлхийн тавцанд унагааж гэмээнэ Монголын ард түмэн л хохирно. Харин Монголын баялгийг арилжиж, тэрбумтан болсон Фрийдланд улам бүр баяжиж, улсаасаа баян гэгддэг Н.Энхбаяр төрийн эрхэнд дахин мацах болно. Фрийдланд ч яахав харь луйварчин. Харин Н.Энхбаярт Монголын ард түмэн ямар гай тарьсан юм бэ? Өр нимгэн монголчууд оймстой хөлөө гозолзуулахыг нь хараад өрөвдөж, хорооны засаг дарга байсан хүүхнийг нь хүртэл УИХ-ын гишүүн болгож өглөө шүү дээ. Гэвч Н.Энхбаярт ганцхан л эрх ашиг бий. Тэр нь дахин төр засгийн эрхэнд гарч, хүүдээ албан тушаал өвлүүлж, Монгол төрөөс өшөөгөө авах явдал! Д.Ихбаяр