Төрийн ордны Их танхимд  өнөөдөр Ардчилсан намын Үндэсний зөвлөлдөх хорооны 39 дүгээр хуралдаан болж  өндөрлөлөө.

Уг хуралдааны үеэр  шийдвэрлэсэн асуудлуудын талаар УИХ дахь Ардчилсан намын бүлгийн дарга Д.Эрдэнэбат дараахь мэдээллийг өгч байна.

 -ҮЗХ-аар ямар асуудлыг шийдвэрлэсэн бэ?

-Ардчилсан намын бүлэг энэ сарын 15-ны өдөр Төрийн ордонд шуурхай хуралдаж УИХ-ын даргад УИХ-ын гишүүн З.Энхболдын нэрийг дэвшүүлэх санал гаргаж ҮЗХ-ний хурлаар хэлэлцэх нь зүйтэй гэж шийдвэрлэсэн. Тиймээс  өнөөдрийн  Үндэсний зөвлөлдөх хорооны хуралдаанаар хэлэлцсэн  дөрвөн чухал асуудлын нэг бол УИХ-ын даргад  УИХ-ын гишүүн З.Энхболдын нэрийг  дэвшүүлэхийг  гишүүдийн 100 хувийн нэгдмэл  саналаар дэмжсэн явдал байв. Хоёрдугаарт, мөн АН-ын бүлгийн хуралдаанаас гаргасан саналын дагуу   Монгол Улсын Ерөнхий сайдад УИХ-ын гишүүн, АН-ын дарга Н.Алтанхуягийг нэр дэвшүүлэх асуудлыг хэлэлцэж 100 хувийн саналаар дэмжлээ. Гуравдугаарт, Эвслийн Засгийн газрыг байгуулахад хамтран ажиллах гэрээ байгуулах, гэрээ хэлцэл, зөвшилцлийг яаж хийх вэ гэдэг  асуудлыг ҮЗХ нэлээд нухацтай авч үзлээ. Үүний үр дүнд ҮЗХ-ноос  АН-ын бүлэгт бусад нам эвсэлтэй зөвшилцөх хэлэлцээрийг шийдвэрлэх үүрэг даалгаврыг өглөө. Тиймээс өнөөдөр 16.00 цагаас АН бүлэг ҮЗХ-ноос өгсөн үүргийн дагуу хурлаа  хийнэ. Энэ хуралдаанаас  гэрээ байгуулах ажлын хэсгийнг зохион байгуулна. Бүлгийн хуралдаанаар байгуулагдсан  ажлын хэсэг нь бусад нам эвсэлтэй эвсэх анхны хэлэлцээрийнхээ ширээний ард сууна гэсэн үг. Дөрөвдүгээрт, Хууль эрхзүйн шинэчлэл хийх асуудлаар УИХ-ын гишүүн Х.Тэмүүжин, УИХ-ыг гишүүн Ч.Сайханбилэг нарын  мэдээлэл хэлэлцүүлгийг сонсгож хуралдаанаа өндөрлөлөө.

-МАХН-МҮАН-ын “Шударга ёс” эвсэлтэй хамтрах асуудлыг ҮЗХ-ны хурлаар хэлэлцсэн гэсэн. АН-ын гишүүд дэмжсэн үү?

-АН-д “Шударга ёс”  эвсэл хамтран ажиллах саналаа илэрхийлсэн. Энэхүү  асуудлыг ҮЗХ-ны  хурлаар хэлэлцэж гишүүдийн олонх нь саналыг дэмжсэн. Гэхдээ асуудлыг ярихдаа ажлын хэсэг зохион байгуулах нь зөв юм байна гэсэн шийдвэрт хүрсэн. Ажлын хэсгээр бидэнд олон хэлэлцэх асуудал бий. Зарим  нэг хүний  ойлголтоор хөнгөн гоомой хандаж болохгүй. Учир нь АН ялалт байгуулсан, энэ ялалтаа баталгаажуулах, эдийн засгийн эрчимтэй өөрчлөлтийг хийх, улс оронд шударга ёс хариуцлагатай байдлыг тогтоох, төрийн байгууллагуудын бүтцийг өөрчлөх, авлига хээл хахуулыг монгол оронд үгүй болгох чинь сэтгэлтэй улс төрийн хүчинтэй ярилцаж, хэлэлцэж шийднэ  гэсэн байр суурьтай байгаа.Түүнээс биш сайд дарга нарын  асуудлыг нэгдүгээрт тавих юм бол манай нам үзэл бодлоосоо ухарч байна гэсэн үг.  Санал тавьсан намуудтай эхэлж хэлэлцээр хийх нь зүйтэй гэж үзсэн.

-АН-ын бүлгээр  бусад нам эвсэлтэй эвсэх асуудлыг эцсийн байдлаар шийднэ гэсэн үг үү?

-АН-ын бүлгээс  байгуулагдсан ажлын хэсэг  нам эвсэлтэй зөвшилцөх, гэрээ хийх үйл ажиллагааг зохион байгуулна. Эцсийн байдлаар хэлэлцсэн гэрээ хэлэлцлийн асуудлыг батлах  эрх нь ҮЗХ-нд үлдсэн гэж ойлгож болно.

-МАН-тай эвсэх үү?

-МАН-аас  хамтрах тухай саналыг албан ёсоор  тавиагүй. “Шударга ёс”  эвслээс гадна ИЗНН болон бие даагчдаас эвсэх  саналаа илэрхийлсэн.

 -Дараагийн ҮЗХ хэзээ хуралдах вэ?

-АН-ын бүлгээс байгуулагдсан ажлын хэсгээс эцсийн байдлаар бусад нам эвсэлтэй хамтран ажиллах гэрээний төсөл гарсны дараа ҮЗХ  хуралдаж шийдвэрээ гаргана. Тэр товыг урьдчилж хэлэх боломжгүй.

-Ардчилсан намын Ерөнхий нарийн бичгийн дарга хэзээ томилогдох вэ?

Дараагийн ҮЗХ-ны хурлаар АН-ын Ерөнхий нарийн бичгийн даргаа сонгогдоно.

Н.Түвшин