МАХН-МҮАН-ын “Шударга ёс” эвслийн бүлгийн дарга Д.Тэрбишдагва, дэд дарга Н.Батцэрэг нар өнөөдөр Төрийн ордонд мэдээлэл хийлээ. Энэ үеэр  АН-аас гаргасан хамтарсан Засгийн газар байгуулах саналыг тус нам дэмжих шийдвэр буйгаа мэдэгдсэн юм. Хурлын дараа тус намын бүлгийн дарга Д.Тэрбишдагваас дараахь асуултад хариулт авлаа.

-“Шударга ёс” эвслээс АН-ын ажлын хэсгээс ирүүлсэн саналыг хэрхэн хүлээж авч байна вэ?

-УИХ-ын  2012 оны сонгуулийн үр дүнгээр  аль нэг нам  олонх болоогүй. Тийм  учраас  АН өчигдөр ҮЗХ-ны  хурлаа хийж манай намтай хамтарсан Засгийн газар байгуулах  тухай санал  албан ёсоор тавьлаа. Бидний зүгээс  эл асуудлыг намынхаа Удирдах зөвлөлийн хурлаар хэлэлцээд  дэмжих шийдвэр гаргасан. Өөрөөр хэлбэл “Шударга ёс” эвсэл АН-тай  хамтарсан Засгийн газар байгуулан ажиллах саналыг дэмжсэн  байгаа юм. Өнөөдөр манай намын ажлын хэсэг  АН-ын ажлын хэсгийнхэнтэй хэлэлцээрийн ширээнд суусан. Маргааш 10.00 цагт хоёр нам хамтран ажиллах тухай төслөө  харилцан солилцоно.

-"Шударга ёс" эвсэл цаашид  АН хамтарч эвслийн Засгийн газар байгуулахаар тохиролцсон нөхцөлд мөрийн  хөтөлбөрөөсөө ямар тодорхой заалтуудыг  оруулах вэ. Хоёр тал цаашид  зөвхөн Засгийн газрын хүрээнд хамтрах уу?

-Хэлэлцээр хараахан эхлээгүй байна. Хамгийн чухал асуудал бол “Шударга ёс” эвслээс  сонгуулийн мөрийн хөтөлбөрт тусгагдсан  таван  хувьсгал хийх хөтөлбөрөөс  гол гол асуудлыг эвслийн Засгийн газрын мөрийн  хөтөлбөрт тусгах ажлыг манай бүлгийн зүгээс хийнэ.   Цаашид хамтарсан Засгийн газарт орох тохиролцоонд хүрвэл улс орны язгуур эрх ашигтай холбоотой  шударга ёсыг сахиулах,  ард түмэн байгалийн баялагтаа эзэн байх зэрэг  тодорхой  заалтуудыг тусгах чиглэл барина. Одоогоор манай нам хамтран ажиллах төсөлдөө мөрийн хөтөлбөрөөсөө тусгах ажилд анхаарал хандуулан ажиллаж байна.

-АН-ын эвслийн Засгийн газарт хамтрах улс төрийн нам хүчинд тавьж буй болзлын босгыг "Шударга ёс" эвсэл давах уу?

- УИХ суудалтай болсон нам эвслүүд өөрсдөө  зохион байгуулалтад орж байна. Бид ч өөрсдийн ажиллах чадвараа хангах үүднээс  бүлэг зохион байгуулалтад орсон. Өнгөрсөн хугацаанд  бүлэг хоёр удаа хуралдлаа. Эхний хуралдаанаар дотоод зохион байгуулалтын асуудлаа хэлэлцсэн. Дараагийн хуралдаанаараа АН-аас ирсэн  хамтрах  саналыг  хэлэлцэж 100 хувийн санал нэгтэйгээр дэмжлээ. Монголын нийгэмд олон тулгамдсан асуудал бий.  "Шударга ёс" эвсэл  сонгогчддоо  тодорхой мөрийн хөтөлбөр гаргаж танилцуулан олны дэмжлэг хүлээсэн.  Тэрхүү мөрийн хөтөлбөрөөсөө хамгийн чухал асуудлаа  Засгийн газрын үйл ажиллагааны мөрийн хөтөлбөрт оруулж ажиллах чиглэл барина. Мөрийн хөтөлбөртөө холбоотой асуудал хамтарч байгаа хоёр намын  хувьд чухал сэдэв. АН-ын мөрийн хөтөлбөрийг судалж үзэхэд олон зүйлд санал нэгдэх боломжтой юм байна гэж харсан л даа.

-АН удирдлагаас Засгийн газрын бүтэцэд өөрчлөлт оруулна  гэсэн байр суурьтай байна.  Зарим яамдыг чиг үүргээр нь салгана гэсэн. Яамдын тоог нэмэх нь  зөв үү?

-Бүтэц зохион байгуулалтын хувьд аль болох давхардлыг хэмнэх бодлого барина.  Зарим яам тамгын газруудад давхардал их  байгааг багасгана. Нөгөө талаар улс орны хөгжилтэй холбоотой  тодорхой яамдад  бүтцийг бий болгохыг үгүйсгэхгүй. Бидний хувьд яамдын тоог нэмэх бодолгүй байна. Гэхдээ хамтарсан Засгийн газар байгуулах хэлэлцээрийн  явцад  шийдэх асуудал гарах  байх. Тодорхой салбарыг хэлэлцээрийн явцад ярихыг үгүйсгэхгүй.

УИХ-ын гишүүн З.Баянсэлэнгэтэй холбоотой эрүүгийн хэргийг шүүхээр шийдэх болсон гэсэн мэдээлэл байна. Энэ талаар ямар мэдээлэл байна вэ?

-УИХ-ын гишүүн З.Баянсэлэнгэтэй холбоотой хэргийг шалгах болсон талаар хэвлэлийн хуудаснаас мэдээлэл авлаа. Албан ёсоор шүүхийн байгууллагаас мэдээлэл ирсэн юм алга.

-“Шударга ёс” эвслийн ажлын хэсгийн бүрэлдэхүүнд ямар хүмүүс орсон бэ?

-Хэлэлцээр хийх ажлын хэсгийн ахлагчаар УИХ-ын гишүүн Ч.Улаан томилогдсон, миний бие Д.Тэрбишдагва, Н.Батцэрэг, Л.Цог, М.Сономпил, Д.Батцогт, МАХН-ын ерөнхий нарийн бичгийн дарга Н.Удвал нарын бүрэлдхүүнтэй байгуулагдсан.

-Хамтарсан Засгийн газарт хэдэн хүн ажиллах боломжтой вэ. Ер нь боловсон хүчний нөөц хэр вэ?

-Боловсон хүчний хувьд та  бүхэн харсан байх. Манай хоёр нам уламжилалт түүхтэй.  Боловсон хүчний нөөц сайн болох нь өнгөрөгч УИХ-ын  сонгуулиар харагдлаа. Бид бүх тойрогт  76 хүчтэй өрсөлдөгч  нэр дэвшүүлсэн.

Н.Түвшин