-Танд холбогдох эрүүгийн хэрэг ямар шатандаа яваа вэ. Прокурор ял төлөвлөсөн, эсэргүүцэл бичсэн гэсэн мэдээлэл байна л даа?

- Надад бараг ял өгчихсөн байх шиг байна лээ. Зөвхөн надад холбогдох хэрэг ч биш манай намын дөрвөн гишүүнд жагсаал цуглаан зохион байгуулсан, прокурорын биед халдсан гэсэн үндэслэлээр  эрүүгийн хэрэг үүсгээд прокурор ял төлөвлөсөн байдаг. Яллах дүгнэлт үйлдсэн прокурор бол цэвэр улс төрийн намын харьяаллаар биднийг яллахыг оролдсон. Шүүх хурлын хэлэлцүүлгийн явцад шүүгч үүнийг анзаарсан. Тиймээс   анхан шатны шүүхээс прокурорыг  хэт нэг талыг барьсан шийдвэр гаргасан байна гэж үзэн хавтаст хэргийг нэмэлт мөрдөн байцаалтад буцаасан. Саяхан мөрдөн байцаагчидтайгаа таарсан. Бидэнд холбогдох хэргийг ямар шатанд явааг мэдэхгүй явна лээ. Гэтэл хэрэг хаана байгаа эсэх нь ч тодорхойгүй байхад хүнийг  гэм буруутайд тооцож ял өгчихсөн явж байна шүү дээ. Энэ бол буруу жишиг тогтсоныг л харуулж байна.

-Мөрдөн байцаалтад хэрэг буцна гэдэг нь таныг гэм буруугүйд тооцсон юм биш шүү дээ?

-Нийслэлийн шүүхэд Ш.Хашбаатар прокурор эсэрүүцэл бичсэн нь үнэн. Нийслэлийн шүүхээс тэрхүү эсэргүүцлийг хүлээж аваагүй гэсэн хариуг би шүүхээс  авсан. Шүүхийн хэлэлцүүлгийн явцад  хавтаст хэргийг  нэмэлт мөрдөн байцаалтад буцаана гэдэг нь  намайг яллах хангалттай нотлох баримт цуглаагүй гэсэн үг. Хүнийг яллах гэж байгаа бол баримт нь хангалттай байх ёстой. Гэтэл тэр үеийн бичлэгээс харахад ямар ч прокурорын биед халдсан зүйл байхгүй. Бичлэгийг нь үзэж болно.

-Жагсаал цуглаан зохион байгуулах тухай хууль гэж  бий. Тухайн үед та бүхний жагсаал хуулийн хүрээнд явагдаж чадсан юм уу?

-Аливаа  улсын иргэн,  хувь хүн аль нэг албан тушаалтанд  өргөдөл гомдол гаргах эрхтэй.  Бид хуулийн байгууллага хэн нэгэн албан тушаалтанд үйлчилж байгаад гомдол гаргасан.  Гэтэл гомдол гаргасан иргэдээ яллах гэж оролдож байна.  Эрүүгийн хэрэг үүсгэлээ. Энэ бол буруу. Яагаад  Монгол Улсын иргэнийнхээ хувиар улсын яллагчид гомдол гаргаж болохгүй гэж.

-Цагдаагийн байгууллагад хэрэг бүртгэгчээр ажиллаж байхдаа хүн амины хэргийг нуун дарагдуулж ажлаасаа халагдсан гэж үнэн үү?

-Би энэ талаар мэдэгдсэн.  Сэтгүүлчид З.Баянсэлэнгэ гэдэг хүнийг яагаад  парламентад ороод ирэв гэдэгт маш их анхаарч байх шиг байна. Яагаад парламентад ард түмний төлөөлөл орж болохгүй гэж. Малчин тариачны төлөөлөл байсан өмнө нь.  Сүүлийн 20 жилд энэ жишиг алдагдсан  учраас намайг их онцолж харж байна. Янз бүрийн өнцгөөс харж бичиж байна шүү дээ. Би цагдаагийн  байгууллагад  ажиллаж байсан минь үнэн. Найз нөхөддөө тусалж алдаа гаргасан маань ч үнэн. Амьд яваа хүн алдаа гаргадаг. Засч болох алдааг хүн   гаргаж  болно. Харин засч болохгүй алдааг гаргаж болохгүй юм. Миний цагдаагийн байгууллагад ажиллаж байхдаа  гаргасан  алдаа минь амьдралын маш их  туршлага өгсөн. Надад олон зүйлийг ойлгуулсан.  Маш том сургамж болсон.  Үүнд би хэн нэгнийг буруутгахыг хүсдэггүй.

-Залиллангийн хэрэгт холбогдож тэнсэн харгалзах ял авч байсан хэрэг үү?

-Үгүй. Ээлжит гүтгэлэг. Би дээр хэлсэн шүү дээ. Намайг янз бүрээр бичиж байна. Харж байна. Гадаадад байдаг ах минь санаа нь зовнисон байдалтай утсаар ярьж байна шүү дээ.  Ах маань "Дүү минь юунд орооцолдчихсон юм бэ. Юу болоод яваад байгаа юм. Санаа зовоод нойр хүрэхгүй байна" гэж ярьж байна. Бид цөөхүүлээ шүү дээ. Нэгнийгээ хэмлэж, гүтгэж, ажиллах эр зоригийг  нь мохоож болох юм уу. Надад ажиллах, суралцах чинь хүсэл эрмэлзлэл байна. Яагаад би парламентад сууж болохгүй гэж. Намайг яаж харж, ямар өнцгөөс дүгнэх нь тэр хүмүүсийн асуудал. Гол нь баримттай бичиж бай. Хортойгоор хэн нэгнийг гүтгэж болохгүй. Хуулийн дор амьдрах хэрэгтэй. Нөгөөтэйгүүр надад УИХ-ын гишүүний бүрэн эрх гэж бий. Үүнийг зөрчиж болох уу та нар.

-Таны мэргэжил хуульч уу?

- Би 1991 онд дунд сургуулиа төгсөөд Дархан-Уул аймгийн Анагаах ухааны коллежийг төгссөн. Үргэжлүүлээд  Цагдаагийн академийг сонсогчоор  дүүргэсэн.   Цагдаагийн байгууллагад гурван жил гаруй хугацаанд ажилласан.

-Хууль хэрэгжүүлэх байгууллагад  тангараг өргөөд ажиллаж байхдаа алдаа гаргаж та.  Тэгвэл хууль тогтоох   дээд байгууллагад саяхан тангараг өргөөд  орж ирлээ. Бас  хууль зөрчиж найз нөхөддөө туслах юм биш биз дээ?

-Цаг хугацаа харуулна.

- "Шударга ёс эвсэл" өнөөдөр АН-ын ажлын хэсгийнхэнтэй хэлэлцээрийн ширээнд сууж байна. Таны бодлоор танай намаас хэдэн сайд төрөх бол?

-Хоёр нам хэлэлцээрийн шатанд явж байна. Урьдчилж намын дотоод асуудлынхаа талаар ам нээх нь дэмий л болов уу. Ямар ч байсан  хэлэлцээрийн явцад  “Шударга ёс эвсэл” мөрийн хөтөлбөртөө тусгасан шударга ёсны хувьсгал, эдийн засгийн хувьсгал хийх гэсэн гол  гол заалтуудыг эвслийн Засгийн газрын мөрийн хөтөлбөрт  оруулах  чиг үүрэг барина.

- Намын дарга тань эрүүгийн хэрэгт холбогдсон. Тэгэхээр  даргатай чинь холбоотой тохироо хийнэ биз?

-Хувь хүнтэй холбоотой тохироо гэж би мэдэхгүй.

Н.Түвшин