Өчигдөр Армений Жермук хотноо Олон улсын шатрын холбооны шилдэг эмэгтэй шатарчдын “ФИДЕ гранпри” тэмцээний тав дахь цуврал эхэллээ. Армений нийслэл Ереванаас 170 км-ийн зайд орших уг хот нь түүх соёлын ихээхэн дурсгалтайгаас гадна рашаан сувилал, амралтын бүс нутгийн хувьд бүс нутагтаа ихээхэн алдартай ажээ. Тус тэмцээнд дэлхийн аварга Хоу Ифань (БНХАУ), дэлхийн аварга асан Хумпи Конеру (Энэтхэг), их мастер Жао Сюэ (БНХАУ), Катерина Лахно (Украин), Жу Вэнжунь (БНХАУ), Надежда Козинцева (ОХУ), Руань Луфэй (БНХАУ), Элина Даниелян (Армен), Нино Хурцизе (Гүрж), Лилит Мкртчян (Армен), Батхуягийн Мөнгөнтуул, Елена Ковалевская (ОХУ) нарын дэлхийн шилдэг 12 эмэгтэй шатарчин тойргийн журмаар өрсөлдөж байна. Мөнгөнтуул эхний өрөгтөө дэлхийн залуу аварга Хоу Ифаньтай хараар тоглон 35 дахь нүүдэлдээ тэнцжээ. Өнөөдөр болох хоёрдахь өргийн тоглолтод Хятадын их мастер Руань Луфэйтэй цагаанаар тоглох юм. Тэмцээн энэ сарын 28-нд өндөрлөнө. Б.Цагаанбаатар Жич: Гранпригийн эхний хоёр шат манай хойд, урд хоёр хөршийн Донын Ростов, Шеньженьд болоход Хоу Ифань түрүүлсэн бөгөөд гуравдахь шатны тэмцээнд ОХУ-ын Нальчикт Хятадын өөр нэг шатарч Жао Сюэ өнгөлсөн байна. Оросын Казаньд явагдсан дөрөвдэх шатны гранприд Словений Анна Музычук, Энэтхэгийн Хумпи Конеру нар боломжит 11 онооноос ижил 9,5-ыг аван тэргүүлжээ. Туркийн Стамбулд болох энэ оны сүүлчийн гранприд манай их мастер Б.Мөнгөнтуул мөн уригдаад байгаа билээ.