Гренландын том мөсөн давхарга сүүлийн гучин жил байгаагүйгээрээ их хайлсныг НАСА-гийн хиймэл дагуулаас авсан зураг харуулж байна. Гренландын хамгийн хүйтэн, өндөр хэсэгт хүртэл гэсэлт явагдсан байна. Мөсөн давхаргын гэссэн хэсэг энэ сарын найманд 40 хувьтай байсан бол дөрвөн өдрийн дараа л гэхэд 97 хувьд хүрсэн байна. Хэдий зуны саруудад Гренландын мөсөн давхаргын тал орчим хэсэг хайлах нь ердийн үзэгдэл боловч энэ жилийн гэсэлтийн хурд, хамарсан талбай эрдэмтдийг цочирдуулж байна. Саяхныг хүртэл хиймэл дагуулд өнгөрсөн гучин жилд харагдсан хамгийн их хэмжээний хайлалт 55 хувьтай байсан юм. НАСА-гийн мэдээлснээр Гренландын хамгийн нимгэн, зах орчмын давхаргаас эхлээд 3 км зузаантай гол хэсэг нь гадаргаараа тодорхой хэмжээгээр хайлсан байна. Ихээхэн хэмжээний хайлах явц өмнө нь Гренландад явагдаж байсан учир энэ явдлыг байгалийн ховор тохиолдол уу, эсвэл хүнээс үүдэлтэй дэлхийн дулаарал уу гэдгийг одоогоор тодорхойлох боломжгүй байгаа аж. Эрдэмтэд Гренландын мөсний ихэнх хэсэг нь эргэн хөлдөж байгаа гэж үзэж байжээ. Хэдхэн өдрийн өмнө мөн Гренландын мөсөн голоос Манхаттен арлыг хоёр нугалсантай тэнцэх хэмжээний том мөсөн уул салсан билээ. Ц.Мишээл