Оросын “Pussy Riot” панк феминист охидын хамтлаг Москвагийн гол сүмд Ерөнхийлөгч Владимир Путиныг эсэргүүцэж дуулснаас болж хоёрдугаар сард баривчлагдсан юм. Тэдний дуу Оросын үнэн алдартны сүмийн эгдүүцлийг төрүүлж, бурхныг доромжилсон гэж буруутгагдсан байна. Надежда Толоконникова, Мария Алёхина, Екатерина Самуцевич нарыг шашныг үзэн ядсан, танхайрсан хэмээн буруутгасан бөгөөд шүүх хурал өнөөдөр болох юм. Тэдэнд долоон жилийн хорих ял оноож магадгүй байна. Дэмжигчид энэ хэрэг эрх баригчдын хүлээцгүй байдлыг харууллаа гэж үзэж байна. Оросын алдар нэртэй 100 гаруй жүжигчин, найруулагч, хөгжимчид бүсгүйчүүдийг суллахыг эрх баригчдаас шаардсан байна. Барууны “Sting”, “Red Hot Chili Peppers” зэрэг хамтлагууд мөн энэ баривчилгаг буруушаасан юм. Тэд өнгөрсөн жилийн сүүлээр Москвагийн дурсгалт газруудад дуулсан бичлэгээ интернетээр цацаж дэлхий нийтийн анхаарлыг татаад байсан юм.               Ц.Мишээл