Монголын жүдо бөхийн холбооны ерөнхий нарийн бичгийн дарга М.Бөхбаттай Лондонгоос баг тамирчдынхаа хамт буцахаас өмнө өчигдөр уулзаж ярилцлаа. Түүний аав, Монгол Улсын гавьяат дасгалжуулагч Ч.Машбат агсан манай оронд жүдо бөхийн спортыг үүсгэн байгуулахад үнэтэй хувь нэмрээ оруулсан гавьяатан бөгөөд хүү нь аавынхаа цагаан мөрөөр замнаж уг спортын түүхэнд төдийгүй Монголын анхны олимпийн аварга, мөн анхны дэлхийн аварга жүдочийг төрүүлэхэд гар бие оролцож яваа нэгэн билээ. -“Лондон-2012” олимпийн өмнөх бэлтгэл сургуулилтын талаар ярих уу? Манай жүдочдын бэлтгэл хэрхэн хангагдсан байв? -Лондон хүрэх зам нэлээн адармаатай байж, баг тамирчид маань 2008 оны олимпийн наадмын дараагаас л тэмцээнд орж эхэлсэн. Дандаа бүтэн багаар тэмцээнд явж байлаа. Тэгээд энэ олимпод есөн тамирчинтай орж, нэг мөнгө, нэг хүрэл медаль хүртэн хоёр шагналт байртайгаар жүдогийн төрөлд багаараа 15-р байрт орлоо. Миний бодлоор бид Лондонд ирсэн зорилгоо биелүүллээ гэж бодож байгаа. Олимпийн аварга Н.Түвшинбаяр маань алтын дайтай мөнгөн медаль хүртсэн. Монголын ард түмэн бүгдээрээ телевизээр үзэж харсан байх. Бас ОУХМ С.Ням-Очир үнэхээр сайхан барилдаан үзүүлж, хүрэл медалийн эзэн боллоо. Даваа бүрт хүндхэн, их л аз туршсан барилдаанууд хийсэн. Цаашдаа Монголын багаас бокс, чөлөөт бөх гээд гол төрлүүдэд медаль авах байх аа. -Олимпийн наадамд барилдсан бусад бөхчүүдийнхээ талаар юу хэлэх вэ? -Манай тамирчид түвшин, арга барил, ур чадварын хувьд ямар ч бөхтэй ойролцоо гэж бодож байна. Зарим нэг тамирчин яльгүй алдаа, сэтгэл санааны бэлтгэлээс болж ялагдсан тал бий. Хэн илүү дайчин, зоригтой, өөртөө итгэлтэй барилдсан нь ялдаг юм байна. Дээр нь дандаа залуу тамирчид энэ олимпийн наадамд түрүүллээ. Тэгэхээр залуу тамирчдын наадам болж байна гэж дүгнэж болно. -Олимпийн аварга Н.Түвшинбаярт монголчууд их санаа зовж байна. Гэмтэл нь хэр хүнд байгаа бол, хэзээ бүрэн эдгэх бол гээд л... -Бид тэмцээний дараа яаралтай түргэн тусламжийн унаагаар хүргүүлж, олимпийн тосгоны нэгдсэн эмнэлэг дээр очсон. Тэндээ шинжилгээ хийлгэж, зураг авахууллаа. Мөн өвдгөөр дагнасан мэргэжлийн эмчид үзүүлсэн. Ер нь Түвшинбаярын бэртэл нэлээн хүндэвтэр талдаа орох юм билээ. Гэхдээ залуу хүн байна. Эмчилгээ хийлгээд эдгэрэх бүрэн бололцоотой. -Дэлхийн аварга, олимпийн хүрэл медальт Х.Цагаанбаатарт Монголын ард түмэн бүгд найдаж байсан боловч санасанд хүртэл барилдсангүй... -Цагаанбаатар монгол түмнийг олон жилийн турш төлөөлж амжилттай барилдсан, яах аргагүй манай шилдэг бөхчүүдийн нэг. Бүх л тэмцээнээс медаль авсан цорын ганц тамирчин шүү дээ. Энэ тэмцээнд өөрөө их том зорилго тавьж ирсэн. Харамсалтай нь эзэн орны бөхөд цаг дуусах мөчид хожигдсон. Мэдээж уралдаан тэмцээн юм чинь нэг нь ялж, нэг нь ялагдана. Олимпийн дэвжээ Цагаанбаатарын хувьд хатуу байлаа. -Жүдогийн тэмцээнд уран гоё барилдаан цөөрсөн юм уу гэж санагдлаа. Энэ нь юутай холбоотой бол? -Энэ талаар мэргэжлийн багш, дасгалжуулагчидтай ярилцаж, санал бодлоо солилцсон. Олимпод хамгийн дээд түвшний тамирчид ирдэг. Дээрээс нь бие биенийхээ барилдааныг дэндүү их судалсан. Тийм болохоор зарим барилдаан цаг сунгах, торгуулах, хантэйгаар ялагчийг тодруулах байдлаар өндөрлөж байв. Дэлхийн цом, ДАШТ-д харьцангуй олон тамирчин оролцдог, дээрээс нь залуу тамирчид ирдэг болохоор уран сайхан барилдаан олон гардаг байх. Харин олимпийн наадамд шилдгийн шилдгүүд барилдаж байгаа болохоор хэн илүү “шатрын нүүдэл” нүүнэ, тэр тамирчин ялах магадлал их байна.