Урд шөнө “Шударга ёс” эвслийн Удирдах зөвлөл хуралдаж, хаашдаа л Н.Энхбаярыг ял авснаас хойш ганцхан МАХН-аас болж хамтарсан засагт багтах гэрээний хэрэгжилтийг сунжруулаад яахав хэмээн хувьсгалаа шуурхайлахаар шийджээ. Иймээс Засгийн газарт эзлэх суудлын талаар АН-тай хэлэлцэхээс өмнө фракцуудтай нь урьдчилан тулж ажиллахаар болсон гэнэ. АН-ын томоохон фракцын гишүүдийг дараах байдлаар жагсаасан байна. Хамгийн нөлөөтэй “Алтан гадас” фракцад намын дарга Н.Алтанхуяг, эрхэм гишүүн С.Баярцогт, Ч.Сайханбилэг, Р.Гончигдорж, Я.Санжмятав, экс гишүүн Я.Батсуурь, Г.Батхүү, Ц.Сэдваанчиг, Л.Гансүх болон тэргүүн шадар сайдын зөвлөх асан Н.Хүрэлсүх,  АПУ-ны П.Батчимэг, БСШУ-ны дэд сайд асан Ч.Куланда, ЭБЭХ-ний дэд сайд асан Б.Ариунсан нар багтжээ. Харин МҮДН фракцын гишүүдэд УИХ-ын гишүүн Ц.Баярсайхан, Р.Амаржаргал, Н.Батбаяр, Д.Эрдэнэбат болон Да.Ганболд, С.Ламбаа, ГХ-ны дэд сайд асан Б.Болор, банкны Б.Мэдрээ нарын хүмүүсийг нэрлэжээ. Одоогоор Ардчилсан хүчний холбоо овоо жин дарж байна. Уг фракцийг спикер З.Энхболд толгойлдог бөгөөд С.Эрдэнэ, Г.Баярсайхан, С.Одонтуяа, Ц.Оюунгэрэл, Ж.Батзандан, Ш.Түвдэндорж нарын төрийн түшээдээс гадна экс гишүүн Д.Одхүү, Сүхбаатар аймгийн Засаг дарга Ж.Батсуурь, О.Магнай нарын лав л 16 хүнийг оруулжээ. МоАХ-ны фракцад эрхэм гишүүн Х.Баттулга, Р.Бурмаа болон Дорноговь, Өмнөговь аймгийн засаг ноёд багтаж байна. Гэхдээ энэ фракц сүүлийн үед хүрээгээ их тэлж байгаа. Зүүн хойд Азийнханд Лу.Болд гишүүн, удахгүй хотын мэр болох Э.Бат-Үүл, экс гишүүн Л.Гүндалай, Б.Батбаяр, Р.Бадамдамдин нарыг нэрлэсэн байх юм. Залуу ардчиллынхнаас Лу.Гантөмөр, “Кроун”-аас парламент дахь эмэгтэйчүүдийн бүлгийн дарга Л.Эрдэнэчимэгээс өөр тоймтой нэрлэчихээр хүн олдоогүй юм уу тэгсхийгээд орхижээ. Д.Дүүриймаа