“Miss International-2011” тэмцээний хоёрдугаар байрын шагналт мисс И.Төгсөө онгоцны үйлчлэгч болохыг мөрөөддөг байсан гэдэг. Гэвч түүнийг “Хэтэрхий өндөр нуруутай байна” гэж дүгнэсэн учраас хүслээ орхиж, өөр мэргэжил сонгосон аж. Мисс, загвар өмсөгч бүсгүйд янз бүрийн ажлын санал ирдэг ч тэрбээр ер хүлээж авдаггүй гэсэн. Харин энэ удаа онгоцны үйлчлэгч болох мөрөөдлөө биелүүлэхээр шийдэж “Face of Mongolian Airlines” фото зургийн уралдаанд оролцож байгаа аж. Энэхүү уралдаанд Facebook хуудсанд нэвтэрч буй 18-30 насны охид залуус оролцох боломжтой бөгөөд өөрийн зургаа илгээж, хамгийн их оноо цуглуулсан нь ялагч болох гэнэ. Тухайлбал, нэгдүгээр байрт шалгарсан эрэгтэй болон эмэгтэй оролцогч агаарын хөлгийн үйлчлэгчээр “Mongolian Airlines” группт ажиллах, нэг жилийн хугацаанд тус компанийн нүүр царай болох эрхтэй. Мөн тус группын үйлдэж буй олон улсын нислэгүүдээс хүссэн нэг чиглэлдээ үнэгүй зорих эрхийг тусгай бэлгийн хамт гардах нь. Тэгвэл хоёрдугаар байрт тодорсон нэг эрэгтэй, хоёр эмэгтэй оролцогч агаарын хөлгийн үйлчлэгчээр тус группт ажиллах эрх, тусгай бэлэг авах юм байна. Р.Есүй