Гэрлэх ёслолын ордны захиалга хэдийнэ дуусчээ. Энэ сарын 16, 20-нд Дашням, Балжинням давхацсан билэгт сайн өдөр тохиож буй тул гэрлэх ёслолоо хийхээр бүртгүүлсэн хосын тоо 80 хол давсан аж. Тус ордонд ёслол үйлдэж, гэр бүлээ баталгаажуулахад 630-700 мянган төгрөгийн ханштай бөгөөд хосууд ямар зан үйл сонгохоос шалтгаалж, нэмэлт үйлчилгээнүүдийг багтаажээ. Тэгвэл хуримын ордны дарга ирэх ес, аравдугаар сард тохиох билэгт сайн өдрүүдэд хуримлахаар төлөвлөж буй хосуудыг нэгэн зэрэг гэрлүүлэх бодолтой байгаа илэрхийлжээ. Гэрлэх ёслолын ордонд бүртгүүлсэн хосууд нэгэн цагт цугларч, сүйн бөгжөө хамтдаа солилцох таатай боломжийг бүрдүүлэхийн тулд олон талын ажил зохион байгуулахаар болсон аж. Тухайлбал, зан үйл болоод гэрлэлт бүртгэх үйл ажиллагааг нэгтгэн тусгай танхим гаргах бөгөөд бусад төрлийн арга хэмжээг ч мөн давхар оруулах гэнэ. Р.Есүй