Рок попын ертөнцөд этгээд хувцас, тод будалт, содон өнгийн үсээрээ ялгаран гарч ирсэн “Visual moon” хамтлагийнхан олны анхаарлыг татаж эхлээд буй. Японы Вижуал Кэе урсгалын төлөөлөл хэмээн өөрсдийгөө нэрлэсэн тэдний хүсэл мөрөөдөл, уран бүтээлийг дэмждэг хүмүүс олон байхад бас элдэв янзаар харааж зүхдэг нь ч цөөнгүй таардаг аж. Тэр ч байтугай, гудамжинд зөрсөн арван хүний найм нь хараадаг төдийгүй бүр чулуу, модоор шиддэг гэж байгаа. Гэвч энэ бүхнийг хэцүү асуудал биш гэж үзсэн этгээд залуус уран бүтээлдээ тууштай хандаж, ээлжит дуугаа дүрсжүүлсэн байна лээ. Хамтлагийн гоцлол дуучин болон гитарчин залуус ихэр бөгөөд урлагт хоёргүй сэтгэлээр хандаж, өвөрмөц төрхөөр гарч ирэх мөрөөдлөө хэнээр ч хязгаарлуулахгүй гэсэн бардам улс. Тиймдээ ч ар гэрийнхэн нь тэднийг дэмжиж, гайхал төрүүлэм сонирхолтой хэв маягийг нь шүүмжилдэггүй гэнэ лээ. Р.Есүй