“Хошин урлагийн продакшнууд дотроо л царайлаг гишүүдтэй” гэж онгирдог “Х-Түц”-ийнхэн тун ч хөгтэй улс. Хөдөө орон нутаг, гадаадад аялан тоглолтоор явах бүртээ онигоотой буцдаг жүжигчид бас нэг нэгэндээ атаархдаг бололтой. Тухайлбал, нэгэн удаа тус продакшныхан хөдөө тоглолтоор явж л дээ. Тоглолт дууссаны дараа нэг гунхсан хүүхэн Онон рүү дөхөж очоод удтал ярилцжээ. Жүжигчин залууг буцаж ирэхэд продакшны  бусад гишүүд “Энэ хэн бэ, чиний фэнүүдийн нэг үү” гэж асуухад цаадах нь их л дуртай толгой дохисон гэнэ. Харин гавьяат жүжигчин Одноо их л дурамжхан “Хн, фэн байхдаа яахав дээ. Чамайг гажигтай болохоор чинь хүүхнүүд ёо ёотой юм яриулах гээд шавдаг байлгүй” гэж ширэв татсан гэдэг. Үнэндээ бол, жүжигчин бүсгүйд харц унагасан залуус хэд гурван үг солих гэж оролдохоор Одноо эргэлдсэн алаг нүдээрээ тас шилбүүрдээд явчихдаг аж. Боловсон ёсыг бодож, нэрээ хичээсэн Онон үзэгч хүүхнүүдийн өдсөн яриаг яаж ийгээд тэвчээд гарчихдаг гэх. Тиймээс эл явдлын дараа “Х-Түц” продакшныхан “Манай царайлагууд бие биедээ атаархдаг юмуу даа” гэж шоолцгоодог болжээ. Р.Есүй