Наймдугаар сарын 9-нд буюу "Лондон-2012" олимпийн наадмын 13 дахь өдөр барилдах эмэгтэй чөлөөт бөхийн 55 кг, 72 кг-ийн жин үзэлт, сугалаа сая өндөрлөлөө. 55 кг-д манай ОУХМ Сүндэвийн Бямбацэрэн эхний тойрогт Шведийн бөх, дэлхийн аварга Софья Матссонтой, 72 кг-д Монгол Улсын гавьяат тамирчин О.Бурмаа Канадын Лорэйн Каллахэнтэй барилдахаар оноот таарчээ. Сугалааны дараа чөлөөт бөхийн ҮШБ-ийн дасгалжуулагч Т.Сүхбаатар "Бөхчүүд маань жиндээ аятайхан орлоо. Сугалаа ч боломжийн татсан байна. Энэ удаагийн олимпийн наадамд манай бөхчүүдээс ердөө гурван хүн л жин хаслаа, бусад нь бараг хасалгүй барилдаж байна" гэв.