Лондоны зуны олимпийн ХХХ наадмын эмэгтэй чөлөөт бөхийн 63 кг-ийн жинд хүрэл медаль авсан С.Батцэцэг: -Та эмэгтэй чөлөөт бөхийнхний түүхэнд олимпийн анхны медалийг авлаа. Бас 1980 оноос хойш тасраад байсан медалийн буухиаг үргэлжлүүлсэн. Энэ мөчид төрж буй сэтгэгдлээ хуваалцана уу? -Монголчууд маань энэ медалийг маш их хүсэн хүлээж байсан. Тийм болохоор сэтгэгдэл маш өндөр байна. -Таны өрсөлдөгч М.Дугренье бол дэлхийн гурван удаагийн аварга том бөх. Түүнтэй яаж барилдах төлөвлөгөөтэй байсан бэ? Төлөвлөснийхөө дагуу барилдаж чадсан уу? -Чадсан гэж бодож байна. Маш туршлагатай бөх болохоор өөрөө алдаа гаргалгүй харзнаж барилдаж байгаад оноо авна гэж бодсон. -Хөлөө алдсан хэрнээ их тайван байгаа харагдсан... -Өнөөдөр ер нь тайван сайхан барилдсан. -Өрсөлдөгч бөх чинь хэр бяртай байв? -Би ер нь бярдуулах нь бага даа. Монгол хүмүүс унаган бяртай байдаг. -Японы бөхөд ялагдсан барилдаанаа эргээд дүгнэвэл? -Надад боломж байсан. Хүний барилдаанд ороод барилдчихсан нь миний алдаа болсон л доо. Бяр муутай хэрнээ ирж наалдсан нялцгар барилдаантай бөх байна лээ. -Олимпийн дэвжээнд таарсан өрсөлдөгчидтэйгөө өмнө нь барилдаж байв уу? -Ихэнхтэй нь анх удаа барилдсан юм байна. -Медалийн төлөө барилдахын өмнө О.Насанбурмаа ямар зөвлөгөө өгсөн бэ? -Манай жингийн эгч маань ховорхон хүний нэг л дээ. Хүнийг хурцалж чаддаг. “Монгол улсын 63 кг ямар хүчтэй вэ гэдгийг харуулаарай. Дүүдээ амжилт хүсье” гэсэн.