Зуны олимпийн ХХХ наадам хаалтаа хийх цаг мөч айсуй. Хаалтаас өмнө өнөөдөр 15 спортын төрөлд медалийн эзэд тодорно. Үүнийг эс тооцвол олимпийн баатрууд хэдийнэ төржээ. Яг одоогийн байдлаар олимпийн амжилтыг медалийн тоо, болон чанараар АНУ-ын баг тамирчид тэргүүлсэн хэвээр байна. Хятадуудаас хоёрхон алтан медалийн зөрүүгээр илүү байсан бол одоо 6 алтаар тэргүүлжээ. Одоо эзэд нь хараахан тодроогүй байгаа алтын төлөө БНХАУ-аас өрсөлдөх тамирчид үлдээгүй. Харин АНУ-ын сагсан бөмбөгийн ""Мөрөөдлийн баг" аваргын төлөө Испанийн шигшээтэй үлдээд байгаа юм. АНУ 44 алт, 29 мөнгө, 29 хүрэл буюу 102 медальтай хол тасарсан бол манай өмнөд хөршийн тамирчид 38 алт,  27 мөнгө,  22 хүрэл буюу 87 медальтай удаалж байна. Харин гутгаар байранд гэрийн эзэд буюу Их Британийн баг тамирчид нийт 62 медаль ба тэдгээрийнх нь 28 нь алтан медаль бүхий амжилтаар бичигдэж байна. Оройхон гараад ширүүхэн дайрсан манай хойд хөршийн тамирчид 21 алтаар 4-рт, БНСУ 5-рт бичигджээ. Манай улсын хувьд 1 мөнгө, 3 хүрэл медальтайгаар 57-р байранд бичигдэж байна. Ингээд уншигч та бүхэн Лондоны олимпод медаль хүртсэн орнуудын дэлгэрэнгүйг үзнэ үү. Н.Өрнө