Албан тушаал эрх мэдлээ урвуулан ашигласан хэрэгт сэжиглэгдэн өнгөрөгч зургадугаар сараас Авлигатай тэмцэх газрын мөрдөн шалгах хэлтэст шалгуулж эхэлсэн  Үндсэний татварын ерөнхий газрын дэд дарга Ж.Батбаярыг өнгөрөгч долоо хоногт саатуулсан тухай мэдээллийг өмнө нь  хүргэсэн билээ.

Зарим нэрээ нууцалсан эх сурвалжийн мэдээллээр сэжигтнээр татагдсан Ж.Батбаяр нь албан тушаалаа ашиглан  найман томоохон  аж ахуйн нэгжийн татварыг хуурамч баримт үйлдэн хөнгөлсөн хэрэгт татагдан хоригджээ.

Түүнд эрүүгийн хэрэг үүсгэх  болсон нь   тус газрын  дотоод хяналт шалгалтын ажилтнууд анх хууль зөрчсөн байж болзошгүй үйлдлийн талаар АТГ-т мэдүүлснээр Эрүүгийн хуулийн 263.2 дахь хэсэгт зааснаар буюу төрийн албан тушаалтан албаны эрх мэдэл буюу албан тушаалын байдлаа урвуулан ашигласны улмаас аж ахуйн нэгж, байгууллага, иргэний хуулиар хамгаалсан эрх, ашиг сонирхолд үлэмж хэмжээний хохирол учруулсан гэсэн үндэслэлээр хэрэг үүсгэсэн байна.

Хэрэв гэм буруутай нь тогтоогдвол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасах буюу хасахгүйгээр хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэхээр хуульчилжээ.

Хавтаст хэрэгт хавсарсан нотлох баримтуудыг шинжлэн судлахаар шинжээчид ажиллаж байгаа аж.

Н.Түвшин