МҮАН-ын дарга М.Энхсайхан “Энхбаярыг урьд шөнө баривчлах гэж оролджээ” хэмээн өөрийн фэйсбүүк хуудсандаа бичсэн нь хоромхон зуур тарж Монголын цахим мэдээллийн хуудсуудын нүүрийг чимлээ. Түүнтэй зэрэгцэн МҮАН-ын Ерөнхий нарийн бичгийн дарга Н.Батцэрэг ч өөрийн фэйсбүүк хуудсандаа “Энхбаярыг урд шөнө баривчлах гэж оролджээ. Өнөөдөр бас үргэжлэх байх” хэмээн бичсэн нь сэтгүүчдийг “түргэн” авахад хүргэв.
Гэхдээ тэд “Энхбаярыг урд шөнө баривчлах гэж оролджээ” гэсэн мессэжийг бичсэнээс бус цаашид үйл явдал хэрхэн өрнөж, баривчлах тушаал авсан хүмүүс яагаад баривчлалгүй үлдээж, маргааш үргэлжлүүлэхээр завдсан талаар ганц үг унагаагүй байтал хэвлэлүүд шүүрэн авч “Ц.Нямдорж
Н.Энхбаярыг баривчлахыг оролджээ” хэмээн дэвэргэж орхив.
МҮАН-ын дарга М.Энхсайхан хаанахын хэдэн ч Энхбаярыг таньдаг мэддэг байж болно. Монголоор дүүрэн Энхбаярууд байхад заавал Ерөнхийлөгч асан Н.Энхбаярыг болгодог нь юу билээ. Бас өнөөдөр бас үргэлжилнэ гэнэ. Шөнө,
өдөр дамнуулан баривчилдаг яасан удаан баривчилгаав дээ гэх бодол төрөв. Харин нэлээд сүүлд МҮАН-ын дарга М.Энхсайхан "Энэ мэдэгдлийг гаргасан оройд нь МАХН-ын дарга Н.Энхбаярыг баривчлах гэж оролдсон байх юм" хэмээн тодотгожээ.
Гэхдээ “Н”-ийг гэж хардах бага зэргийн сэжүүр байна аа. Өчигдөр Ерөнхийлөгч асан Н.Энхбаяр хэвлэлийн хурал зарлаж Хууль зүй, дотоод хэргийн сайд Ц.Нямдоржийн хөрөнгийн талаар мэдээлэл хийсэн. Тэрээр насаараа төрийн албан хаагч байсан Ц.Нямдорж, түүний эхнэр, хүүхэд нь төрийн албанд ажилладаг, ямар ч бизнес эрхэлдэггүй гэгддэг мөртлөө хаанаас, ямар орлогоор дараах өмчтэй болсноо олон нийтэд тайлбарлахыг шаардаж хөрөнгийнх нь жагсаалтыг гаргасан байсан юм.
Тухайлбал, Туул голын эрэг дээр Алтжингийн Алтангийнхтай хөрш зэргэлдээ амьдардаг 1 сая ам.долларын үнэтэй байр, Чингэлтэй дүүргийн 18-р хорооны задгай буюу Билгүүн уулын энгэрт байдаг 600.000 ам.долларын үнэтэй 3 давхар хаус, хоёр хүүдээ бариулж байгаа, тус бүр нь 1 сая орчим ам.долларын үнэтэй 2 хаус гэхчилэнгээр хувийн хаусны талаар дурьдаж эдгээр хөрөнгө нь Төрийн өндөр албан тушаалтны хөрөнгө орлогын мэдүүлгийн жагсаалтанд байгаа Ц.Нямдоржийн мэдүүлэгт байхгүй байна гэхчилэн Хууль зүйн сайдын хавирганаас нь хатгасан мэдээллүүдийг хийсэн юм. Гэхдээ л хэлье гэснээ хэний ч өмнө улайхгүйгээр, час хийтэл хэлчихдэг Ц.Нямдорж сайд юу юуны туханд хүрэлгүй баривчилгаа энэ тэр хийж “шог” зан гаргах хүн мөн болов уу гэдэг эргэлзээ бас л төрж байгаа юм. Ёстой л хошин урлагийн жүжигчин Хүрлээгийн уншдаг “Эргэлзээ” шүлэг шиг үйл явдал ид өрнөж байна.
Гэхдээ улстөр ажиглагчдын хувьд энэ талаар тэс өөр байр суурьтай байгаа юм. Тодруулбал, “Энхбаярыг урд шөнө баривчлах гэж оролджээ” гэснээс бус Н.Энхбаяр гэсэн овгийн үсэг байхгүй, түүнчлэн Н.Энхбаярыг хаана, хэзээ, ямар үндэслэлээр, яаж баривчлахыг завдсан талаарх мэдээлэл байхгүй байгаа нь зориудаар нисгэсэн “бор шувуу” байх талтай. Энэ нь Хууль зүйн сайд руу шидсэн “чулуу”-гаа “булуу” болгож олны анхааралд оруулах гэсэн хатгаас гэж үзэж байгаа юм.
Тэгэхээр нэгэн цагт Монгол улсын Ерөнхийлөгчийн суудлын төлөө нэр дэвшиж байсан өрсөлдөгчид эвсэл байгуулж найрамдсныхаа дараа чулуу хөөлгөх УЛСТӨРЧ бодлогоо ийн явуулж эхлэв бололтой.
Ж.Хулан
СЭТГЭГДЭЛ БИЧИХ