"Хар санаа ба хайр сэтгэл", "Надад өгөөгүй хайр", "Зүүдний үргэлжлэл" зэрэг кино, жүжгийн дуугаараа олонд танигдсан залуу уран бүтээлч Ц.Хулан бие даасан хоёр дахь жааз дууны цомгоо гаргахаар бэлтгэж буй аж. 2005 онд “My World” нэртэй анхны цомгоо гаргаснаас хойш тэрбээр хэсэг хугацаанд нам гүм байсан билээ. Харин өдгөө “My World-2” нэртэй түүний хоёр дахь цомгийн ажил нь 40 хувьтай явж байгаа төдийгүй ирэх аравдугаар сард сонсогчдын хүртээл болох гэнэ. Үүнээс гадна дуучин бүсгүй монгол дуунуудаа ч цомог болгохоор зорьж, хүмүүсийн  сонсох дуртай кино, жүжгийн бүтээлүүдийг багтаах ажээ. Урлагийн мэргэжилтнүүдэд өндрөөр үнэлэгддэг дуучин бүсгүйн охин “Эрэл” сургуулийн наймдугаар ангид сурдаг хэдий ч, тэрбээр дахиж амьдрал зохиох талаар бодох дургүй байгаа аж. “Залуу насанд нөхрийн хэрэг алга” гэж толгой сэгсэрсэн Ц.Хулан уран бүтээлээс өөр зүйлд анхаарал хандуулахыг хүсэхгүй байгаагаа дуулгажээ. Үүгээр ч зогсохгүй, олонд танигдсан бүсгүйчүүд болон шинээр гарч ирсэн охидын хамтлагуудад сануулга өгч “Хажуугаар дайрчих шахаад өнгөрдөг нусгайнууд рок попын тогоонд хайруулаад ирэхээрээ аяндаа мэдрэх байлгүй” гэж шүд зуужээ. Р.Есүй