Баянзүрх дүүргийн нутаг дэвсгэр, авто зам эгээ л бөмбөгдөлтөд өртөж, газар хөрвөөсөн мэт болоод байна. Үнэндээ замын асуудлаас зөвхөн дүүрэг ч биш Нийслэлийн хэмжээнд онцгой байдал зарлах дээрээ тулаад байгааг хэн хүнгүй мэднэ. Гэхдээ Баянзүрх дүүргийн хувьд гамшгийн голомт болоод байна. Зам дээр үүссэн хагарал цоорол нь сүүлдээ том хэмжээний нүх болж автомашин эгээ л дотор нь уначих шахахыг яана. Төмөр хүлгийн гаслаан, ёолоон гэж байдаг бол Баянзүрхийн, онцолбол офицеруудын ордноос зүүн дөрвөн замын уулзвар хүртэлх зам дээр чих дөжрөөх хэмжээнд туллаа. Дарга нарын явдаг замыг засаж байхаар Нийслэлийн зүүн төвийн замын хөдөлгөөний ачааллыг нугалж өгдөг энэ замыг засахгүй яагаад өдий хүргэв ээ гэж жолооч нар хараал зүхлээ барж дууслаа. Дарга нар нь бороо, уснаас болж зам засварын ажил саатлаа гэнэ. Ажилчид нь ухсан нүх, асгасан шороогоо манах үүрэгтэй мэт тамхи татан үүрэглэн суусаар зуны улирал дуусаж есдүгээр сартай золгох нь. Зун цаг ирэх үеэр офицероос зүүн дөрвөн зам хүртэлх замын дундуурх явган хүний чөлөөний модон хайсыг будуулж харагддаг. Жил бүр л сарайж сэрийсэн хайсыг тохижилтын хэдэн ажилчнаар гарыг нь сарвайтал будуулахынхаа оронд хажуудах замыг нь эртнээс засахаа боддоггүй мөн ч дүүрсэн дарга нар юм. Энэ дүүргийн удирдлага ч гэж хэцүүхэн. Д.Сүхбаатарын хөшөөг тэрбум төгрөгөөр хүрэлдсэн У.Хүрэлсүх даргынхаа жишээг дагасан уу, Баянзүрх дүүргийн засаг дарга Б.Батзориг 750 сая төгрөгөөр нохойны хөшөө бариулж түмний эгдүүцлийг хүргэсэн нь саяхан. Хувийнхаа “Грийн хаус” хэмээх компанид мөнгө төлж бариулсан гэх мэдээлэл ч хэвлэлүүдээр явдаг. Үнэн худлыг нь тогтоодог газар нь мэдэх бизээ. Хөшөөг мэдээж хэрэг дүүргийн өнгө үзэмж, тохижилтод зориулан босгосон нь лавтай. Гэсэн хэдий ч тэр мөнгөөр жилийн жилд эвдэрч замын компаниудын эздийн халаасыг дүүргэж байдаг замаа, арай хүнд наалдацтай “тохижилт”-оо хийсэн бол... Нохойтой хөшөөний аюулгүйн тойргоор өнгөрөх жолооч нар эрүүгээ жолоондоо нудчих шахан донслохдоо яг ингэж харуусаж байгаа гэдэгт мөрийцсөн ч алдахгүй. Үүнийг уншсан хэн нэгэн зам засварын ажил дүүргийн төсвөөс гарахгүй гэх байх л даа. Гэхдээ ноён Б.Батзориг хауснаасаа дүүргийнхээ Тамгын газарт нисдэг тэргээр морилдоггүй л юм бол өнөөх замын түгжрэл, эвдрэл дундуур гарч л яваа. Тэгэхдээ нэгийг боддог болов уу. УИХ-ын сонгуульд нэр дэвшин өрсөлдөж, тойрогтоо ихийг хийж бүтээнэ хэмээн явах хойгуур тань ажлын байрны тань урдуур өнгөрдөг хэврэгхэн зам ямар болсныг харж байна уу. Одоо хичээл сургууль эхлэж, ажил ид өрнөх цагаар офицероос 13 хүртэлх замыг засна гэж, хаана, халтуурдана. “Хотын зам” хэмээх хийсэн ажил нь нийслэлчүүдийг бухимдуулж явдаг хэрнээ тендерт ид шидийн гэмээр байнга ялдаг компани Сансрын тунелын нүхэн гарцыг өнө удаан хийх болно. Ингээд зүүн төвийн замууд түгжрэл, бухимдлын халуун голомт болж хувирна гэдгийг Нийслэлийн шинэ удирдлагууд анхааралдаа авах бизээ. Хотын хөгжил, хүн амын өсөлтийг тооцоолоогүй хот төлөвлөлт дээр нэмэрлээд одоогийн авилга, хүнд сурталд идэгдэж, дотоод гадаадын компаниудын гар хөл болсон Нийслэлийн удирдлагууд, дүүргийн эрх мэдэлтнүүд Улаанбаатараар мөн ч их тоглож байна даа. Н.Өрнө Гэрэл зургийг Б.Мөнх-Эрдэнэ