Нийслэлийн МАН-ын хорооны шинэ дарга Цэндсүрэнгийн Сандуй сонгуулийн ялагдлаа хүлээн зөвшөөрч, тахимаа өгсөн Г.Мөнхбаярын оронд сонгогдсон юм. УИХ-ын сонгуулийн дүнг авч хэлэлцсэн тус намын Бага хурлаас удирдлагуудаа бүрэн өөрчилсөн нь МАН-д улс төрийн соёл арваад жилийн дараа нэвтэрч буйгийн шинж. Ц.Сандуй анх нийслэлийн лаборатори нэгдүгээр сургуульд орж, 1988 онд математикийн гүнзгийрүүлсэн сургалттай 31 дүгээр сургуулийг төгсчээ. 1995 онд ОХУ-ын Москва хотын Эдийн засаг, статистикийн дээд сургуулийг инженер, эдийн засагч мэргэжлээр дүүргэж, 1997 оноос нийслэлийн Засаг даргын Тамгын газарт мэргэжилтэн, хэлтсийн дарга зэрэг алба хашиж байгаад 2012 онд Засаг даргын орлогчоор дэвшжээ. Одоо хотын намын 220 гаруй мянган гишүүдээ удирдаж, орон нутгийн сонгуульд оролцсоноор ажлын гараагаа эхлэх гэж байна. С.Аня