УИХ-ын чуулганы нэгдсэн хуралдаан үргэлжилж байна. Ардчилсан намын бүлгээс УИХ-ын дэд даргад УИХ-ын гишүүн С.Баярцогтыг нэр дэвшүүлсэнтэй холбогдуулан УИХ дахь МАН-ын бүлгийн дарга Н.Энхболд “МАН-ын бүлгээс УИХ-ын дэд даргад УИХ-ын гишүүн М.Энхболдыг нэр дэвшүүлсэн байтал яагаад өнөөдрийг хүртэл энэ асуудлыг УИХ-аар хэлэлцэн шийдвэрлээгүй байтал, дөнгөж өнөөдөр нэр дэвшүүлсэн С.Баярцогтыг шууд чуулганы нэгдсэн хуралдаанд оруулж ирэв.

Дээр нь танилцуулгадаа УИХ-ын сонгуулийн дүнд үндэслэж УИХ-ын дэд даргыг нэр дэвшүүллээ гэлээ. МАН энэ удаагийн сонгуулийн дүнд 25 суудал УИХ-д аваад байгаа. Яагаад энэ асуудлыг хэлэлцэн шийдвэрлэж өгөхгүй байна вэ” гэлээ. Харин УИХ-ын дарга З.Энхболд “МАН эхэлж бүлгээ байгуулах ёстой, түүний дараа УИХ-ын дэд даргад нэр дэвшүүлэх хүнээ санал болгох ёстой. Ингээгүй тохиолдолд хууль зөрчих болж байна. Нэр дэвшигтэй холбоотой асуудлаар асуулт тавиагүй тул дараагийн хүн асуултаа тавих ёстой гэсэн юм. Харин УИХ-ын гишүүн Ё.Отгонбаяр “УИХ хяналтгүй болж байна, Засгийн газрын гишүүдийг УИХ-ын гишүүдээс томилох нь,  төр ч данхайлаа. Ерөнхий сайдад хандан хэлэхэд, эмгэнэл илэрхийлье, ардчилал нас барлаа” гэсэн юм.

Мөн үүний дараа УИХ-ын гишүүн Су.Батболд горимын санал гаргаж буйгаа мэдэгдэв. Энэ нь УИХ-ын дэд даргад нэр дэвшигч С.Баярцогт, М.Энхболд хоёрыг хамтад нь УИХ-ын дэд даргад нэр дэвшүүлэн томилохыг хүсэж байна. Ийм саналын томъёоллоор санал хургаалгаж өгөхийг хүсье” гэв. Харин УИХ-ын Тамгын газрын хуульчийн тайлбараар хэлэлцэх асуудлын дараалалд оруулаагүй асуудлаар горимын санал хурааж болох тухайд тодорхой зохицуулалт байхгүй тухай хэлсэн тул түүгээр санал хураалгасангүй, дараагийн гишүүн асуулт тавьсан юм.

Ингэхдээ МАН-ын бүлгийн гишүүд голчлон асуулт тавихдаа ардчиллын үнэт зүйлийг жинхэнэ утгаар нь ярьж байгаа бол бодитоор хэрэгжүүлээч ээ хэмээн УИХ-ын гишүүн Д.Оюунхорол хэллээ. Мөн Улстөрийн ардчиллыг тааламжтай болгохыг УИХ-ын даргаас хүслээ. Өмнөх парламентад Ардчилсан нам 27 суудал авсан байхад МАН хүндэтгэлтэй хандаж, цөөнхийг ямагт хүндэтгэж ирсэн. Харин харамсалтай нь энэхүү зарчим алдагдсан талаар тэрбээр мөн хэллээ. УИХ-ын гишүүн С.Баярцогт хууль санаачлах эрх нь нээлттэй байгаа гэв.

Үүний дараа Д.Дэмбэрэл  С.Баярцогтыг УИХ-ын дэд даргад нэр дэвшсэн нь зөв. Энэхүү албан тушаалт зохино гэв. Харин УИХ-ын анхдугаар чуулганы тухай хариулт тань санал нийлэхгүй байна гэл ээ. Тэрбээр “Би зөвшилцөл явуулахыг хүссэн. Хуралдааныг зарласан.Таньд зөвлөхөд УИХ-ын дэд даргын асуудлыг улс төржүүлж болохгүй гэж зөвлөе” гэснээр үгээ дуусгалаа. Хуралдаан санал хэлэх ажиллагаа үргэлжилж байна.

Н.Түвшин