Засгийн газрын бүтэц бүрэлдэхүүн батлагдсаны дараа АН-ын дарга, Монгол Улсын Ерөнхий сайд Н.Алтанхуяг өөрийн танхимын гишүүдийн нэрсийг өнөөдөр УИХ-д өргөн барьсан юм. Сайд нарыг УИХ-ын байнгын хороодоор хэлэлцэж бүрэн дэмжсэн учир УИХ-ын нэгдсэн чуулганыг зарлан хуралдуулсан. Улмаар УИХ-ын дэд даргад АН-ын бүлгийн зүгээс гишүүн С.Баярцогтыг санал болгосон ба МАН-ын зүгээс дэд даргад М.Энхболдыг санал болгож хэлэлцэхийг санал болгосон. Гэсэн ч АН-ын бүлгээс гишүүн С.Баярцогтыг УИХ-ын дэд даргаар батлаж дөнгөсөн. Энэ үед М.Энхболдыг санал болгосон асуудлыг хэлэлцсэнгүй хэмээх шалтгаанаар МАН-ын гишүүд завсарлага хүсэж чуулганыг орхин гарсан. Түр завсарлагын дараа МАН-ын гишүүд чуулганы хуралдаанд орж ирээгүй ч чуулган үргэлжилж сайд нарын томилгооны асуудлыг шуурхай хэлэлцлээ. Ингэснээр Ерөнхий сайдын өргөн барьсан нэрсээс Засгийн газрын Хэрэг эрхлэх газрын дарга, Төрийн сайдаар Ч.Сайханбилэг, Гадаад харилцааны сайдаар Л.Болд, Хууль зүйн сайдаар Х.Тэмүүжин, Барилга, хот байгуулалтын сайдаар Ц.Баярсайхан, Батлан хамгаалахын сайдаар Д.Бат-Эрдэнэ, Зам тээврийн сайдаар А.Гансүх, Соёл, спорт, аялал жуулчлалын сайдаар Ц.Оюунгэрэл, Уул уурхайн сайдаар Д.Ганхуяг, Үйлдвэр, хөдөө аж ахуйн сайдаар Х.Баттулга, Хөдөлмөрийн сайдаар Я.Санжмятав, Хүн амын хөгжил, нийгмийн хамгааллын сайдаар С.Эрдэнэ, Эдийн засгийн хөгжлийн сайдаар Н.Батбаяр, Боловсрол, шинжлэх ухааны сайдаар Л.Гантөмөр нарыг тус тус томиллоо. Харин МАХН-МҮАН-ын "Шударга ёс" эвслээс нэр нь тодрох Шадар сайд,  Эрүүл мэнд, Эрчим хүч, Сан, Байгаль орчин, ногоон хөгжлийн сайд нарыг эцсийн байдлаар хэлэлцэн тохиролцоогүй шалтгаанаар түр хойшлулснаар өнөөдрийн чуулган өндөрлөлөө. АН-ын дарга Н.Алтанхуягийн УИХ-д оруулсан тус намын 13 сайд ийнхүү өөрийн намын болон МАХН-МҮАН-ын "Шударга ёс" эвслийн гишүүд, бие даагч нарын дунд санал хураалт явуулснаар томилогдлоо. Н.Өрнө