Дэд сайд, агентлагийн дарга нарын томилгоо зах зухаасаа чих дэлсэж байна. Гүйцэтгэх засаглалын танхимын гишүүдээ Засгийн газрыг хамтарч байгуулсан нам, эвслийнхэн бялуу хуваах журмаар томиллоо. Харин дэд сайдууд бол ачааны хүндийг гардан үүрэх хүмүүс. Гэтэл аль ерээд оны сүүлчийн Н.Бадамдамдин гишүүн, “молекул” Батж.Батбаярын банди нар дарга болох санаатай гэнэ. Төрийн алба гэдэг угсаа залгамжилсан, цус ойртсон хүмүүсийн цуглуулга биш. Ерөнхийлөгч тойрогт унасан нэр дэвшигчдийг сайд болгохгүй гээд байхад Ерөнхий сайд хэрэгсээгүй. Хэрэв тийм юм бол тэднээс дэд сайдаар томилж яагаад болохгүй гэж. Ялангуяа том тойрогт ялагдсан ч гэсэн ялснаас дутахгүй хүмүүс байна. Увсад Ч.Хүрэлбаатар, Б.Чойжилсүрэн хоёрт луйвардуулсан Д.Нямхүү, Баян-Өлгийн хязгаарт муухан эрээс дутахааргүй өрсөлдсөн Ч.Куланда, Өвөрхангайд өвдөг шороодох ажлаа өөрсдөө хийсэн С.Чинзориг, Н.Төмөрхүүгээс болоод асуудал нь сунжирсан Г.Батхүү нарыг нэрлэж болно. Ч.Куланда гэхэд ардчиллын анхны цөөхөн эмэгтэйн нэг. Өнгөрсөн дөрвөн жилд НИТХ-д АН-ын бүлгийн даргаар маш сайн ажилласан Б.Ариунболд, тэргүүн шадар сайдын зөвлөх байсан, нам, аж ахуйн ажилд цөөнгүй жил нухлагдсан Н.Хүрэлсүх нарын залуусын боловсрол мэдлэг, ажлын арга туршлага, нэр хүнд өнөөдөр намын хаалгаар дөнгөж орж ирсэн өчигдрийн бацаануудаас хамаагүй дээр. Ядаж дэд сайд, агентлагийн даргад араа даах, амных нь салиа арилсан залуусаар тавьж, өөрийн толгойгоор жаахан шийдэхгүй бол хүний хүүхдүүд хүрэн бөөртэй шүү. Эрхэм гишүүн Ц.Нямдорж юу гэж хэллээ, бөөр руу чинь дүрнэ гэсэн шүү. Дээлийн шинэ, хүний хуучин нь гэдэг дээ. Юун молекулын молекул... С.Аня