Иргэдийн гомдлын мөрөөр

Хичээлийн шинэ жил эхлээд удаагүй байтал сэтгэл эмзэглэм мэдээллүүд ар араасаа чих дэлсэж эхэллээ. Баянгол дүүргийн V хорооны нутаг дэвсгэр, III эмнэлгийн орчимд гарсан ослын дараа өөрийн эрхгүй дээшээ өлийж, толгой дээгүүр ямар гээчийн барилгын тоног төхөөрөмж “дарж алахаар” гэтэж буйг сэрэмжлэн харах болов. Тэрхүү осолтой адил эмгэнэлт явдал давтагдах вий хэмээн болгоомжилсон оршин суугчид манай редакцид хандсан юм. Ингээд иргэдийн санал, гомдлын мөрөөр манай сурвалжлах баг Баянзүрх дүүргийн гуравдугаар хороог зорилоо. 61-р цэцэрлэг орчмын орон сууцны оршин суугчдын ая тухыг Клиникийн нэгдсэн II эмнэлгийн хашаанд барьж эхэлсэн барилгын ажил 24 цагийн турш алдагдуулсаар иржээ. Тэнд өнгөрсөн жил БНСУ-ын Засгийн газраас 300 сая ам.долларын хөнгөлөлттэй зээлээр босгох “Үндэсний оношлогоо эмчилгээний төв”-ийн шавыг тавьсан нь өдгөө гурван давхар болоод байна. Гэтэл энэхүү эмнэлгийн өргөтгөлтэй зэрэгцүүлээд шахуу орон сууцны барилга бариад эхэлчихжээ. 24 цагийн турш барилгын ажил зогсоо зайгүй өрнөж хавь ойрын оршин суугчдыг бухимдуулсаар, үүний зэрэгцээ тус барилга дээр ажиллаж буй өргөгч кран сургууль, цэцэрлэгтээ явдаг хүүхдүүдийн толгой дээгүүр, таван давхар орон сууцыг шүргэх шахан ажиллаж байгаа нь иргэдийг айдаст автуулжээ. Цэцэрлэг, орон сууцнаас хэдхэн метрийн зайд баригдаж буй барилгын кран өдөр бүр таны хүүхдүүдийн толгой дээгүүр барилгын материалаа зөөж, цонхыг тань шүргэх шахан өнгөрч байна гээд боддоо. Энэхүү барилгын ажлыг "City palace" хэмээх барилга, угсралтын компани гүйцэтгэж буй. Нийтийн эзэмшлийн талбай, орон сууц, үйлчилгээний газар, эмнэлэг сургуулиас тодорхой хэмжээний зайд барилга угсрах журам өнөөдөр мөрдөгдөхгүй байгаагийн нэг жишээ энэ аж. Тухайлбал, Хот, тосгоны төлөвлөлт, барилгажилтын норм, дүрэм гэж байдаг. Тус дүрэмд нийтийн эзэмшлийн зай талбайд 2-3 давхар барилга хооронд 15, дөрвөн давхар барилга хооронд 20 метр байхаар заасан байдаг талаар Мэргэжлийн хяналтын ерөнхий газрын Барилга техникийн хяналтын улсын ахлах байцаагч Ж.Нэргүй тайлбарлаж байна. Энэ заалтыг дагаж мөрдсөн ч бай үгүй ч бай, өргөгч кран 61-р цэцэрлэгээс холгүйхэн, цэцэрлэг, сургуульдаа явах хүүхдүүдийн толгой дээгүүр эргэлдэх нь зөв үү. Эмнэлгийн хашаан дотроос шүү. Нийслэл хотод газар нүдний гэм болсон энэ цагт барилгын компаниуд алхам тутамд шахуу орон сууц, худалдаа үйлчилгээний барилга барих ч тэдгээрийн үнэ ханш огтхон ч буурахгүй улам өссөөр байгаа. Нэг талаараа их бүтээн байгуулалт зогсоо зайгүй өрнөсөөр байгаа хэдий ч албан тушаалтнуудын халаасыг түнтийлгэн байж олж авсан алга дарам газартаа нийтийн эрх ашиг, аюулгүй байдлыг үл тоомсорлон барилга угсралтын ажлаа эхэлдэг болжээ. Хэдхэн хоногийн өмнө болсон осол ч энэ журмыг баримтлаагүйгээс гарсан гэхэд болно. Осол гарсан тэр барилга зөвшөөрөлтэй байсан байлаа ч бетон зуурмаг шахах машины тулгуур нурах л байсан. Нурахад нь нийтийн эзэмшлийн талбайгаас хол байсан бол өнөөдөр хэн ч хохирохгүй байлаа. Харамсалтай нь хууль, дүрмийг уландаа гишгэгч, авилгачдын харгай иргэдийн элгийг харлуулсаар л. Нийслэлийн Иргэдийн төлөөлөгчдийн хурлын тэргүүлэгч Д.Баттулга захирамж гаргаж Нийслэлийн хөрөнгөөр барих барилга, ажлаас бусад барилгын ажлыг шинээр эхлүүлэх, өргөтгөхийг энэ оны наймдугаар сарын 1-ний өдрөөс түр зогсоосон. Хэдийгээр зөвшөөрлөө энэ захирамж гарахаас өмнө авсан байлаа ч өнөөдөр бусдын амь, нас, эд хөрөнгө, оршин суугчид болоод өвчтнүүдийн тав тухыг алдагдуулах эрх тэдэнд байхгүй. Нөгөөтэйгээр эмнэлэг, сургууль, цэцэрлэг өөрийн гэсэн эдэлбэр газартай байх ёстой гэсэн норм бий. Гэтэл нийслэлд хуруу дарам цөөхөн байдаг томоохон эмнэлгүүд өөрсдийн эдэлбэр газраа бусдад дээрэмдүүлээд дуусч байна. Эмнэлгийн байгууламж улсын онцгой обьектод хамаардаг. Гэтэл Эх хүүхдийн эрүүл мэндийн үндэсний төвийн эзэмшил газарт л гэхэд  хэд хэдэн барилга барьж, газар шороог нь сэндийчсэн байдалтай байгаа. Мөн Гэмтэл согог судлалын үндэсний төв хашаанд барилга барих гэснээс болж хүнд өвчтнүүд эмнэлгийн үүдэнд түргэний машинаар хүргүүлж чадахгүйд хүрээд байгаа тухай хэвлэл мэдээллийн хэрэгслүүд мэдээлж байна. Цаашлаад энэхүү жагсаалт Клиникийн нэгдсэн II эмнэлгийн хашаанд барьж байгаа дээрх орон сууцны барилгаар үргэлжилж байгаа нь энэ. Энэ бүхэнд хараа хяналт тавьж, зохих арга хэмжээг авахгүй юм бол наанадаж бусдын тав тух, эрх чөлөө боогдож, цаашлаад хүний амь насанд аюул заналхийлсээр л... Д.Цэцэг Б.Мөнх-Эрдэнэ